ABŞ və Kanada arasında ticarət danışıqları bərpa olundu - Texnologiya vergisi ləğv edildi
Kanadanın Baş naziri Mark Karni, ölkəsinin ABŞ texnologiya şirkətlərinə tətbiq etməyi planlaşdırdığı vergidən imtina etməsindən sonra ABŞ ilə ticarət danışıqlarının yenidən başladığını açıqlayıb. Bu qərar, ABŞ Prezidenti Donald Trampın texnologiya vergilərinə etiraz olaraq Kanada ilə ticarət danışıqlarını dayandırdığını bildirməsindən sonra verilib.
Crossmedia.az xarici mediaya istinadən bildirir ki, Tramp Kanada tərəfindən texnologiya firmalarına tətbiq olunacaq vergiləri “ölkəmizə birbaşa və açıq hücum” kimi qiymətləndirib və bu səbəblə danışıqları dayandıracağını bəyan etmişdi. Məlumata görə, Tramp bu fikirləri cümə günü bildirib və planlaşdırılan verginin bazar ertəsi qüvvəyə minəcəyini qeyd etmişdi. Lakin sonradan bazar günü Kanada və ABŞ liderləri arasında telefon danışığı baş tutub və danışıqların davam etdirilməsi qərara alınıb.
Kanadanın Baş naziri Mark Karninin ofisi bildirib ki, ABŞ ilə münasibətlərin normallaşdırılması məqsədilə texnologiya vergisi planı ləğv edilib və rəsmi Ottava bu sahədəki razılaşmanı “gözləyərək” yenidən nəzərdən keçirəcək. Kanada və Meksika son vaxtlar ABŞ-nin tətbiq etdiyi və fentanil qaçaqmalçılığı ilə mübarizə bəhanəsi altında tətbiq olunan 25 faizədək əlavə tariflərlə üzləşmişdi. Yeni qərar iki ölkə arasında ticarət münasibətlərində gərginliyin azaldılmasına yönəlib.
Səmayə Qədirova
11:26 30.06.2025
Oxunuş sayı: 887
