Milyarderlər 10 ildə 6,5 trilyon dollar qazandı, dünya əhalisinin yarısı yoxsulluq içindədir
Son 10 ildə dünyanın 3 min milyarderi ümumilikdə 6,5 trilyon dollar gəlir əldə edib. Bu məbləğ qlobal ümumi daxili məhsulun (ÜDM) 14,6 faizinə bərabərdir. Eyni dövrdə dünya əhalisinin təxminən yarısı – 3,7 milyarddan çox insan isə yoxsulluq içində yaşayır.
Crossmedia.az xarici mediaya istinadən bildirir ki, bu göstəricilər Böyük Britaniyanın "Oxfam" təşkilatının yeni hesabatında yer alıb. Sənəddə bildirilir ki, 2015-ci ildən bəri ən varlı 1 faiz öz sərvətini 33,9 trilyon dollar artırıb. Bu məbləğ qlobal yoxsulluğu 22 dəfə aradan qaldırmaq üçün kifayət edərdi.
Təşkilat bildirir ki, Dayanıqlı İnkişaf Məqsədlərinə çatmaq və planetin qorunması üçün hər il 4 trilyon dollar tələb olunur. Lakin bu vəsaitlərin böyük hissəsi super zənginlərin şəxsi hesablarında cəmlənib.
Eyni zamanda hesabatda qeyd olunur ki, zəngin ölkələr son illərdə xarici yardımları kəskin şəkildə azaldır. Yardıma ən çox ehtiyacı olan aşağı gəlirli ölkələrin əksəriyyəti borc böhranı ilə üz-üzədir və yüksək faizlə borclanma səbəbindən səhiyyə və təhsilə vəsait ayıra bilmir.
1995–2023-cü illərdə şəxsi sərvət dövlət sərvətindən 8 dəfə daha çox artıb. Milyarderlər sərvətlərinin cəmi 0,3 faizi qədər effektiv vergi ödəyir. Oxfam, hökumətləri varlı təbəqəni daha ədalətli şəkildə vergiyə cəlb etməyə çağırır. 13 ölkədə keçirilən sorğuya görə, hər 10 nəfərdən 9-u bu təklifi dəstəkləyir.
Fatimə Nəbiyeva
21:38 26.06.2025
Oxunuş sayı: 784
