Deputat: “Afrika ölkələri ilə əməkdaşlığın genişləndirilməsi bütün tərəflər üçün faydalıdır”
Azərbaycan müstəqilliyini bərpa etdikdən sonra Afrika ölkələri ilə ikitərəfli və çoxtərəfli əməkdaşlığın inkişafına xüsusi önəm verib. Son illərdə bu münasibətlər daha da dərinləşərək, siyasi dialoq, iqtisadi əməkdaşlıq və humanitar sahələri əhatə edir. Keniyada Azərbaycan səfirliyinin açılması bu əlaqələrin strateji xarakter aldığını göstərir. Rəsmi Bakı Afrikaya investisiya yatırımı və texnoloji təcrübə mübadiləsi baxımından mühüm tərəfdaş kimi baxır. Bu kurs, qlobal miqyasda Azərbaycanın artan nüfuzunu və multilateral diplomatiyasını nümayiş etdirir.
Milli Məclisin deputatı Müşfiq Cəfərov Afrika ölkələri ilə Azərbaycan arasında mövcud əməkdaşlıq imkanları və yeni istiqamətlər barədə Crossmedia.az-a açıqlama verib.
M.Cəfərovun sözlərinə görə, Azərbaycan müstəqilliyini bərpa etdikdən sonra beynəlxalq birliyin bütün üzvləri, o cümlədən Afrika ölkələri ilə həm ikitərəfli, həm də çoxtərəfli əsasda əlaqələr qurmaq istiqamətində mühüm addımlar atıb. Deputat qeyd edib ki, Afrika ölkələri ilə Azərbaycan arasında müxtəlif sahələr üzrə əməkdaşlıq imkanları mövcud potensialdan daha genişdir.
Deputat vurğulayıb ki, Azərbaycanın qlobal və regional miqyasda artan nüfuzu, iqtisadi potensialı və gücü, eləcə də Prezident İlham Əliyevin nüfuzlu Lider kimi yürütdüyü uğurlu siyasət Afrika ölkələrinin Azərbaycanla əməkdaşlığa marağını getdikcə daha çox artırır. O bildirib: “Bir sıra Afrika ölkələrinin dövlət başçıları Azərbaycana səfər etmək, ikitərəfli münasibətləri daha da gücləndirmək niyyətlərini ifadə edib, ölkəmizi qitəyə investisiya qoymağa çağırıblar".
Müşfiq Cəfərov əlavə edib ki, bütün bu amilləri nəzərə aldıqda, qitə ölkələri ilə prioritet sahələrdə əməkdaşlığın davam etdirilməsi hər iki tərəf üçün faydalı və strateji əhəmiyyət daşıyır.
Deputat bildirib ki, Azərbaycanın Keniyanın paytaxtı Nayrobi şəhərində səfirliyinin rəsmi fəaliyyətə başlaması ikitərəfli əməkdaşlığın daha sistematik və əhatəli şəkildə həyata keçirilməsinə töhfə verəcək. Onun fikrincə, bu səfirliyin açılışı həm də siyasi dialoqun daha intensiv və davamlı olmasına şərait yaradacaq.
M.Cəfərov qeyd edib ki, Azərbaycan ilə Keniya arasında BMT, Qoşulmama Hərəkatı və BMT-nin İqlim Dəyişikliyi Konfransı (COP29) kimi çoxtərəfli platformalar çərçivəsində qarşılıqlı etimad və dəstəyə əsaslanan əməkdaşlıqlar mövcuddur. Həmçinin, iki ölkə arasında iqtisadiyyat, ticarət, investisiyalar, informasiya və kommunikasiya texnologiyaları, enerji və təbii ehtiyatlar, kənd təsərrüfatı və turizm, iqlim dəyişikliyinə qarşı mübarizə və yaşıl transformasiya sahələrində əməkdaşlıq üçün böyük potensial olduğu bildirilib.
Müşfiq Cəfərovun fikrincə, dövlət xidmətlərinin əlçatanlığının təmin edilməsi sahəsində də əməkdaşlıq uğurla davam edir. O qeyd edib ki, Azərbaycanın unikal layihəsi olan “ASAN Xidmət” ilə Keniyanın “Huduma Proqramı” arasında intensivləşən əməkdaşlıq artıq özünü doğrultmağa başlayıb.
Deputat sonda əlavə edib ki, təhsil və mədəniyyət sahələri üzrə mübadilələrin artırılması da gözlənilir. O bildirib: “Azərbaycan və Keniya arasında təhsil və mədəniyyət sahələri üzrə mübadilələrin artırılması da gözləniləndir".
Fatimə Nəbiyeva
15:45 04.06.2025
Oxunuş sayı: 13160
