Rusiya: Avropa Ukraynaya qoşun göndərməyə hazırlaşır
Rusiya Avropa ölkələrinin Ukraynaya hərbi kontingent göndərmək üçün sistemli hazırlıq gördüyünü iddia edir.
Crossmedia.az xəbər verir ki, Rusiyanın ATƏT-dəki daimi nümayəndəsi Dmitri Polyanski bu barədə açıqlama verib.
Diplomatın sözlərinə görə, Moskva Avropa İttifaqının müharibəyə hazırlıq apardığını göstərən getdikcə daha çox məlumat əldə edir.
“Əlimizdə olan məlumatlara əsasən, noyabrda Polşada ‘İstəklilər koalisiyası’ Ukraynaya qoşunların göndərilməsi üzrə təlimlər keçirəcək. Bundan sonra bizi inandırmağa çalışırlar ki, guya Avropanı müharibə ilə hədələyən Rusiyadır. Halbuki faktlar bunun əksini göstərir”, – deyə Polyanski bildirib.
Qeyd edək ki, “The Times” nəşrinin məlumatına görə, noyabrda Polşada keçiriləcək hərbi təlimlərdə Böyük Britaniya, Fransa, Almaniya və Polşadan ən azı 1500 hərbçinin iştirakı nəzərdə tutulur.
Təlimlərdə Ukraynada mümkün atəşkəsdən sonra beynəlxalq hərbi kontingentin yerləşdirilməsi, şəxsi heyətin və maddi-texniki təminatın daşınması ssenariləri məşq ediləcək.
Bununla belə, təlimlərin keçirilməsi Avropa ölkələrinin hazırda Ukraynaya qoşun göndərmək barədə yekun qərar qəbul etdiyi anlamına gəlmir.
18:10 22.10.2026
Oxunuş sayı: 58
