Uşaqlara qayğı Azərbaycanın əsas prioritetlərindəndir
1 İyun – Beynəlxalq Uşaqlar Günü dünyanın bir çox ölkəsində olduğu kimi Azərbaycanda da qeyd olunur. Bu, ölkəmizdə uşaqlara göstərilən dövlət qayğısının bariz nümunəsi kimi qeyd olunur. Uşaqların sağlam böyüməsi, keyfiyyətli təhsil alması və təhlükəsiz şəraitdə inkişafı dövlət siyasətinin əsas istiqamətlərindəndir. Bu məqsədlə müxtəlif sosial proqramlar həyata keçirilir, hüquqi mexanizmlər ardıcıl olaraq təkmilləşdirilir. Hər il olduğu kimi, bu il də uşaqlara həsr olunmuş tədbir və layihələrlə onlara olan diqqət bir daha nümayiş etdirilir.
Ölkəmizdə uşaqlara göstərilən qayğı sistemli sosial siyasətin tərkib hissəsidir. Uşaqların təhlükəsiz və mənəvi cəhətdən sağlam mühitdə böyüməsi üçün mühüm proqramlar tətbiq olunur. “Uşaq Hüquqları haqqında” Qanun və bu sahədə qəbul edilən dövlət proqramları uşaqların hüquqlarının qorunması və sosial müdafiəsinin təmininə yönəlib. Prezident İlham Əliyevin rəhbərliyi, Heydər Əliyev Fondunun təşəbbüsləri və birinci vitse-prezident Mehriban Əliyevanın dəstəyi nəticəsində valideyn himayəsindən məhrum olmuş, sağlamlıq imkanları məhdud və aztəminatlı ailələrdən olan uşaqlara xüsusi diqqət göstərilir.
Azərbaycanda uşaqların hüquqlarının müdafiəsi və hərtərəfli inkişafı sahəsində həyata keçirilən tədbirlər dövlət və ictimai qurumların birgə fəaliyyəti ilə daha da səmərəli təşkil olunur. 1 İyun – Uşaqların Beynəlxalq Müdafiəsi Günü münasibətilə müxtəlif şəhər və rayonlarda, o cümlədən hərbi hissələrdə keçirilən tədbirlər bu qayğının təzahürüdür. Bu tədbirlərdə uşaqların vətənpərvərlik ruhunda tərbiyəsi, fiziki və mənəvi inkişafı əsas mövzular sırasındadır. Bütün bunlar göstərir ki, uşaqların rifahı və xoşbəxt mühitdə böyüməsi Azərbaycan dövlətinin prioritet istiqamətlərindən biridir.
Uşaqların Beynəlxalq Müdafiəsi Günü ilk dəfə 1950-ci il iyunun 1-də qeyd olunub. Bu qərar 1949-cu ildə Parisdə keçirilmiş Qadınların Beynəlxalq Demokratik Federasiyasının konqresində qəbul edilib və həmin tarixdən başlayaraq 1 iyun uşaqların hüquqlarının müdafiəsinə həsr olunmuş beynəlxalq gün kimi tanınır. Hazırda bu gün dünyanın əksər ölkələrində olduğu kimi, Azərbaycanda da geniş tədbirlərlə qeyd olunur.
Respublika üzrə təşkil edilən tədbirlərdə uşaqların sosial müdafiəsi, təhsili və sağlamlığı ilə yanaşı, onların milli-mənəvi dəyərlər əsasında formalaşdırılması əsas istiqamət kimi müəyyən olunub. Dövlətin uşaq siyasəti yalnız hüquqların qorunması ilə kifayətlənmir, eyni zamanda uşaqların intellektual və vətənpərvər ruhda yetişməsi üçün əlverişli şəraitin yaradılmasına xidmət edir. Bu sahədə əsas hüquqi baza 1998-ci il mayın 19-da qəbul edilmiş “Uşaq Hüquqları haqqında” Azərbaycan Respublikasının Qanunudur.
Qeyd olunanlar bird aha göstərir ki, uşaqların sağlam gələcəyinə diqqət və qayğı Azərbaycanın əsas prioritetlərindəndir. Bu isə o deməkdir ki, Azərbaycanın təkcə bu günü yox, sabahı da əmin əllərdədir.
Fatimə Nəbiyeva
07:22 01.06.2025
Oxunuş sayı: 1885
