Rusiya 909 ukraynalı hərbçinin cəsədini qaytardı, əvəzində 34 cəsəd aldı
Rusiya və Ukrayna arasında daha bir hərbçi cəsədlərinin mübadiləsi baş tutub. Bu barədə Rusiya Dövlət Dumasının deputatı, hərbi əməliyyat məsələləri üzrə parlament əlaqələndirmə qrupunun üzvü Şamsail Saraliyev məlumat verib.
Crossmedia.az xəbər verir ki, bu barədə “RBK” məlumat yayıb.
Saraliyevin sözlərinə görə, bu dəfə Rusiya tərəfi Ukraynaya 909 hərbçinin cəsədini təhvil verib və qarşılığında 34 rusiyalı hərbçinin cəsədini geri alıb.
Son aylar ərzində tərəflər arasında analoji mübadilələr mütəmadi şəkildə baş tutur. Belə ki, 18 aprel tarixində keçirilən əvvəlki mübadilə zamanı Rusiya 41 hərbçinin cəsədini geri qaytarmış, Ukraynaya isə 909 cəsəd təqdim etmişdi. Mart ayında mübadilə 43 rusiyalıya qarşı 909 ukraynalı, fevralda isə 45 rusiyalıya qarşı 757 ukraynalı formatında həyata keçirilmişdi.
Qeyd edək ki, bu cür mübadilələr döyüş bölgələrində həlak olmuş hərbçilərin cəsədlərinin ailələrinə qaytarılması məqsədi daşıyır və humanitar xarakter daşıyan addım kimi qiymətləndirilir.
Nigar Rəhimova
18:20 16.05.2025
Oxunuş sayı: 693
