ASELSAN 2024-cü il fəaliyyət hesabatını açıqladı
Türkiyənin müdafiə sənayesi şirkəti ASELSAN 2024-cü il üzrə fəaliyyət hesabatını dərc edib.
Crossmedia.az xəbər verir ki, bu barədə Defence Turk sosial şəbəkə platforması X-də məlumat yayıb.
Hesabatda şirkət tərəfindən hazırlanmış döyüş sursatları və hədəf yönləndirmə sistemləri barədə ətraflı məlumat yer alıb.
Məlumata görə, ASELSAN şirkətinin 1000 funtluq universal bombaları ağıllı sursata çevirən LGK-83 lazer yönləndirmə dəsti və 500 funtluq bombalar üçün nəzərdə tutulan HGK-82 yüksək dəqiqlikli yönləndirmə dəstinin ilk ixracatı həyata keçirilib.
Qeyd edək ki, şirkət, həmçinin TOLUN sursatının ixracı sahəsində də uğur əldə edib. Hesabatda Asiya və Afrika ölkələrinə TOLUN və SADAK 4T sursatlarının tədarükü ilə bağlı ixrac müqavilələrinin imzalandığı qeyd olunub.
Bundan əlavə, ASELSAN və TÜBİTAK SAGE tərəfindən birgə hazırlanan, 500 funtluq universal bombaları lazerlə hədəf alan ağıllı sursata çevirən GÖZDE yüksək dəqiqlikli yönləndirmə dəstinin də ilk dəfə ixrac edildiyi bildirilib.
Xumar Emilqızı
13:00 15.05.2025
Oxunuş sayı: 860
