Səlcuq Bayraktar: "Barbaros Xeyrəddinin varisləri yeni bir dünyanın qapılarını aralayır"
Keçən ay Türkiyənin istehsalı olan bir tonluq zərbə dronu Bayraktar TB3 ilk dəfə olaraq TCG Anadolu aviadaşıyıcısından havaya qalxaraq qısa bir missiyanı yerinə yetirdikdən sonra uğurla gəminin uçuş göyərtəsinə enib.
Crossmedia.az xəbər verir ki, bu barədə SavunmaSanayiST.com sosial şəbəkə platforması X-də məlumat yayıb.
Qeyd edək ki, Baykar şirkətinin rəhbəri və Türkiyənin aparıcı pilotsuz uçuş aparatları istehsalçısı olan Səlcuq Bayraktar bildirib ki, bu, dünyada pilotsuz uçuş aparatının ilk dəfə bu formada əməliyyatı yerinə yetirməsidir.
O deyib: “Necə ki, bir neçə əsr öncə Fatih Sultan Mehmet Xan gəmiləri qurudan keçirərək desant əməliyyatlarında yeni bir dövr başlatdı, bu gün Bayraktar TB3 də qısa uçuş-enmə zolağına malik gəmilərdən avtomatik qalxıb enmə qabiliyyəti ilə dəniz müharibəsində yeni bir eranın qapılarını açdı. O, həm kəşfiyyat aparmaq, həm də hədəflərə zərbə endirmək gücünə malikdir".
Bildirək ki, Bayraktar qeyd edib ki, ABŞ və İsrailin qabaqcıl şirkətləri bu texnologiyanı ilk tətbiq edəcəklərini açıqlasalar da, yarış məhz bu hadisə ilə başlayıb və liderliyə Bayraktar TB3 ilə Türkiyə Hərbi Dəniz Qüvvələri çıxıb.
O, TCG Anadolu gəmisinin heyətinə səslənərək belə deyib: “Necə ki, bir zamanlar biz dənizlərə hökm edirdik, bu gün siz – Barbaros Xeyrəddinin varisləri, yeni bir dünyanın qapılarını araladınız".
Xumar Emilqızı
12:20 15.05.2025
Oxunuş sayı: 705
