Özbəkistanda üzərində “Türk-xaqan” yazılmış qədim sikkə tapılıb
Özbəkistanda aparılan arxeoloji qazıntılar zamanı üzərində “Türk-xaqan” sözləri yazılmış qədim sikkə aşkarlanıb. Mütəxəssislərin ilkin dəyərləndirməsinə görə, bu nadir artefakt VI əsrə aid ola bilər. Sikkənin üzərindəki yazı isə türk adının tarixdəki ilk izlərindən biri kimi qiymətləndirilir.
Crossmedia.az "TRT Haber"-ə istinadən bildirir ki, tapıntı türk tarixinin tədqiqi baxımından mühüm əhəmiyyət daşıyır. Arxeoloqlar və tarixçilər sikkənin üzərindəki yazının erkən türk dövlətlərinə və o dövrün siyasi quruluşuna dair yeni məlumatlar təqdim edə biləcəyini düşünürlər.
Araşdırmalara görə, sikkədə yer alan “Türk-xaqan” ifadəsi o dövrdə mövcud olmuş siyasi hakimiyyətin və etnik kimliyin simvolu kimi çıxış edib. Bu, həm də türk adının ilk dəfə rəsmi və yazılı şəkildə istifadə olunmasına dair vacib sübut kimi təqdim olunur.
Qeyd edək ki, qədim türklərin tarixi, onların dövlətçilik ənənələri və mədəniyyət izləri son illərdə geniş araşdırma mövzusuna çevrilib. Bu kimi tapıntılar isə tədqiqatçılara türk tarixini daha dəqiq öyrənmək imkanı yaradır. Sikkə hazırda mütəxəssislər tərəfindən detallı təhlil edilir və gələcəkdə muzeydə sərgilənməsi planlaşdırılır.
Fatimə Nəbiyeva
09:58 15.05.2025
Oxunuş sayı: 739
