Xarici xəbərlər

Tarixdə ən böyük silah sazişi: ABŞ və Səudiyyə Ərəbistanı arasında 142 milyard dollarlıq müqavilə imzalandı

ABŞ və Səudiyyə Ərəbistanı arasında ümumi dəyəri 142 milyard dollar olan silah satışı ilə bağlı yeni müqavilə imzalanıb.

Crossmedia.az xəbər verir ki, bu barədə ABŞ mediası Ağ Evin açıqlamasına istinadla məlumat yayıb.

Bildirilib ki, bu razılaşma iki ölkə arasında tarixən imzalanmış ən iri hərbi müqavilədir.

Səudiyyə Ərəbistanının vəliəhd şahzadəsi Məhəmməd bin Salman Ər-Riyadda keçirilən Səudiyyə Ərəbistanı–ABŞ İnvestisiya Forumunda çıxışı zamanı bildirib ki, tədbir çərçivəsində ümumi dəyəri 300 milyard dollardan çox olan, müxtəlif sahələri əhatə edən çoxsaylı sazişlər imzalanıb.

Bu sazişlər ədliyyə, səhiyyə, gömrük və hava nəqliyyatı sahələrində əməkdaşlığı nəzərdə tutur.

Vəliəhd şahzadə qeyd edib ki, ABŞ-la 92 il əvvəl başlayan iqtisadi münasibətlər hazırda 600 milyard dollarlıq tərəfdaşlıq potensialı əsasında inkişaf etdirilir.

O əlavə edib ki, hazırda Səudiyyə Ərəbistanına qoyulan xarici investisiyaların dörddə biri ABŞ şirkətlərinə məxsusdur. 2013–2024-cü illər ərzində iki ölkə arasındakı ticarət dövriyyəsi isə 500 milyard dollara çatıb.

Müdafiə sahəsində imzalanan anlaşmalar Səudiyyə Ərəbistanı ordusunun modernləşdirilməsi və enerji-müdafiə sahələrində əməkdaşlığın gücləndirilməsini nəzərdə tutur.

Aybəniz Səfərova

🖨 Çap et

00:19 14.05.2025

Oxunuş sayı: 536