Tramp Yəməndəki bombardmanları niyə dayandırdı? – ABŞ mediası səbəbləri açıqladı
ABŞ-ın prezidenti Donald Trampın Yəməndəki hərbi əməliyyatları gözlənilmədən dayandırmasının səbəbləri barədə geniş hesabat dərc edilib. Hesabatda Vaşinqtonun hava əməliyyatlarında uğur qazana bilmədiyi və ciddi maliyyə və insan riskləri ilə üzləşdiyi qeyd olunur.
Crossmedia.az xarici mediaya istinadən bildirir ki, Tramp administrasiyası Yəməndə 30 günlük intensiv bombardmandan sonra vəziyyətin təhlilini tələb edib. Hazırlanan hesabatda ABŞ-ın hava üstünlüyü qazana bilmədiyi, pilotsuz uçuş aparatlarının görünməmiş dərəcədə tez-tez vurulduğu və yalnız ilk ayda bu əməliyyatlara 1 milyard dollardan çox vəsait xərcləndiyi bildirilib.
Hesabatda həmçinin qeyd olunur ki, Oman rəsmiləri Trampın yaxın çevrəsindən olan Stiv Vitkoffa ABŞ-a kampaniyadan çıxmaq təklifi veriləcəyini bildiriblər. Amma bunun üçün Tramp Yəmənlə birbaşa danışıqlara, İsrailin iştirakı olmadan, razılıq verməli idi. Tramp da bu şərti qəbul edib.
Mənbələrə görə, Səudiyyə Ərəbistanı ABŞ-a husilərin 12 yüksək vəzifəli nümayəndəsinin adını təqdim edərək, onların zərərsizləşdirilməsinin hərəkatı zəiflədə biləcəyini bildirib. Lakin həmin şəxslərdən heç biri öldürülməyib. Həmçinin, husilərin hava hücumundan müdafiə sistemləri ABŞ-ın F-16 və F-35 qırıcılarını vurmaq həddinə çatıb və bu, ABŞ hərbçilərinin həyatına ciddi təhlükə yaradıb. Vaşinqtonun istifadə etdiyi müasir silahlar və yüksək dəqiqlikli bombalar isə husilərin infrastrukturuna ciddi ziyan vura bilməyib.
ABŞ Müdafiə naziri Pete Hegseth isə Səudiyyə Ərəbistanı və Birləşmiş Ərəb Əmirliklərini Yəməndə quru əməliyyatlarının bərpasına sponsorluq etməyə razı salmağa çalışıb. Lakin bu təşəbbüs də nəticəsiz qalıb. Bütün bu faktorlar Tramp administrasiyasının əməliyyatı dayandırmaq qərarına gəlməsində əsas rol oynayıb.
Fatimə Nəbiyeva
21:29 13.05.2025
Oxunuş sayı: 825
