Çin Pakistana J-35 qırıcılarının çatdırılmasını sürətləndirir
Çin beşinci nəsil J-35 döyüş təyyarələrinin Pakistana çatdırılmasını nəzərdə tutan proqramın icrasını sürətləndirib. İlk partiyanın 2026-cı ilin sonuna qədər Pakistana çatdırılması gözlənilir. Hazırda Pakistan Hərbi Hava Qüvvələrinin pilotları Çin ərazisində bu təyyarələrin idarə olunması ilə bağlı təlimlərdə iştirak edirlər.
Crossmedia.az xarici mediaya istinadən bildirir ki, Çin və Pakistan arasında əldə olunan razılaşmaya əsasən, Pekin İslamabada ümumilikdə 40 ədəd J-35 tipli beşinci nəsil qırıcı təyyarə təqdim edəcək. Müqaviləyə uyğun olaraq, bu proses mərhələli şəkildə həyata keçiriləcək. Hərbi mənbələrin məlumatına görə, əgər bölgədə siyasi və hərbi gərginlik daha da artarsa, Çin tərəfi öz Hərbi Hava Qüvvələrinin ixtiyarında olan təyyarələrdən bir qismini də Pakistana verməyə hazırdır.
Qeyd edək ki, J-35 qırıcıları yüksək manevr qabiliyyətinə, radarlardan yayınma texnologiyasına və müasir silah sistemlərinə malikdir. Bu təyyarələr Pakistan Hərbi Hava Qüvvələrinin döyüş qabiliyyətini əhəmiyyətli dərəcədə artıracaq və ölkənin hava məkanının müdafiəsində strateji üstünlük təmin edəcək.
Müşahidəçilər bu addımı Çinlə Pakistan arasında hərbi əməkdaşlığın yeni mərhələyə keçidi kimi qiymətləndirirlər. Ekspertlər bildirirlər ki, bu tip silah tədarükü regionda qüvvələr balansına təsir edə bilər və xüsusilə Hindistanla münasibətlər fonunda diqqətlə izlənməlidir.
Hazırda Çin və Pakistan arasında müdafiə, texnologiya və təlim sahələrində əməkdaşlıq genişlənməkdədir. J-35-lərin verilməsi bu əməkdaşlığın təkcə simvolik deyil, praktiki və strateji əhəmiyyət daşıdığını göstərir.
Fatimə Nəbiyeva
10:40 03.05.2025
Oxunuş sayı: 1098
