“Evə qayıtmaq istəmirlər” – Kəmalə Ağazadə itkin düşən qızların vəziyyətindən danışdı
Son günlərdə itkin düşərək sonda taksi sürücüsünün evində tapılan yeniyetmə qızlarla bağlı ictimaiyyətdə ciddi narahatlıq yaranıb. Hadisə cəmiyyətdə uşaqların təhlükəsizliyi, ailə nəzarəti və psixoloji dayanıqlığı məsələlərini yenidən gündəmə gətirib. Qızların hazırda reabilitasiya mərkəzində saxlanılması və psixoloji durumlarının qiymətləndirilməsi ilə bağlı proseslər davam edir.
Azərbaycan Uşaqları İctimai Birliyinin sədri Kəmalə Ağazadə Crossmedia.az-a bir müddət əvvəl itkin düşərək taksi sürücüsünün evində tapılan qızların psixoloji vəziyyəti və reabilitasiya prosesi ilə bağlı açıqlama verib. O bildirib ki, hazırda istintaq davam etdiyindən bəzi detallara toxunmaq mümkün olmasa da, qızların vəziyyətində müsbət dinamika müşahidə olunur.
“Hazırda onlar reabilitasiya prosesindədirlər. Təxminən on gündür ki, evdə deyillər və bu müddət ərzində uyğunlaşmaları baş verib. Həm valideynləri onlara baş çəkib, fikirlərini alıblar, həm də uşaqlar özləri burada qalmaq istədiklərini bildiriblər,” – deyə Ağazadə qeyd edib.
Kəmalə xanımın sözlərinə görə, yeniyetmələrin burada qalmaq istəyi onların yaşadığı psixoloji gərginlik, qorxu və utanc hissi ilə bağlıdır: “Ətrafları burada onlara bənzər yaş qrupunda olan qızlardır. Onlar interaktiv fəaliyyətlərlə məşğuldurlar. Bu da onları buraya daha çox bağlayır və reabilitasiya prosesinin uğurlu getdiyini göstərir.”
Ağazadə eyni zamanda valideyn məsuliyyətinə də toxunaraq bildirib ki, uşaqların belə situasiyalara düşməsinin səbəblərindən biri ailədəki diqqətsizlik və nəzarətsizlikdir: “Bu, birinci qaçış deyildi. Daha öncə də belə bir hal yaşanmışdı. Valideynlər uşaqlara düzgün nəzarət etməlidirlər. Qadağalar anlaşılan və izah olunan formada qoyulmalıdır. Uşaqla dost olmaq, onu dinləmək və izləmək əsas şərtlərdir.”
Sədr onu da vurğulayıb ki, bu kimi hallarda hüquq-mühafizə orqanlarının, yerli icra hakimiyyətlərinin, sosial xidmət qurumlarının və digər aidiyyəti təşkilatların birgə işi mühüm rol oynayır. Onun sözlərinə görə, cinsi zorakılıq, məişət zorakılığı və itkin düşmə kimi hallar cinayət xarakteri daşıyır və bu məsələlərdə Daxili İşlər Nazirliyinin üzərinə böyük məsuliyyət düşür.
“Uşağın rifahı ilə bağlı qanunvericilik nə tələb edirsə, biz onu tətbiq edirik və bütün qurumlarla əməkdaşlıq içindəyik,” – deyə Kəmalə Ağazadə əlavə edib.
Fatimə Nəbiyeva
18:55 30.04.2025
Oxunuş sayı: 2459
