“Çindən Azərbaycana turist axınının artması yeni iqtisadi imkanlar açır”- RƏY
Son dövrlərdə Azərbaycanla Çin arasında münasibətlərdə yeni dinamika müşahidə olunur. Dünyanın ən iri iqtisadiyyatlarından birinə sahib olan Şərq nəhəngi ilə əməkdaşlıq, Azərbaycanın beynəlxalq nüfuzunun artmasına və daxili iqtisadi potensialının genişlənməsinə mühüm təsir göstərir. Xüsusilə, viza rejiminin sadələşdirilməsi biznes əlaqələrinin sürətlənməsinə və qarşılıqlı investisiyaların təşviqinə geniş imkanlar açır. Bütün bu proseslər, iki ölkə arasında münasibətlərin gələcəkdə daha da dərinləşəcəyinə ciddi ümidlər yaradır.
İqtisadi elmlər doktoru, professor, Milli Məclisin dörd çağırış deputatı Rüfət Quliyev Crossmedia.az-a açıqlamasında vurğulayıb ki, Bakı ilə Pekin arasında əlaqələr yeni mərhələyə qədəm qoyub: “Münasibətlər həm iqtisadi, həm də siyasi sahələrdə sürətlə inkişaf edir. Hazırda Şərqi Asiyanın iqtisadi nəhəngi, ABŞ-la birlikdə qlobal iqtisadiyyatın ilk iki pilləsini paylaşır və bu baxımdan Azərbaycan üçün rəsmi Pekinlə əməkdaşlıq xüsusi əhəmiyyət daşıyır. Onun sözlərinə görə, son illərdə iki ölkə arasında nəqliyyat, texnologiya və yaşıl energetika sahələrində əməkdaşlıq intensivləşib”.
O əlavə edib ki, münasibətlər artıq strateji tərəfdaşlıq səviyyəsinə yüksəlib və bu status hər iki tərəfin imzaladığı rəsmi sənədlərdə öz əksini tapir: “Bu isə tərəflər arasında yüksək səviyyəli etimadın və qarşılıqlı maraqların göstəricisidir. Xüsusilə viza rejiminin sadələşdirilməsi məsələsinə gəldikdə,pandemiyadan əvvəl yerli sahibkarlar Çinə səfər zamanı viza almaqda çətinlik çəkir, bunun üçün 300-500 dollar arasında xərc çəkirdilər. İllik çox girişli (multi) vizalar isə min dollara qədər bahalaşırdı. Onun sözlərinə görə, hazırda bu maneələr aradan qaldırılır və iş adamları üçün daha əlverişli şərait yaradılır”.
R.Quliyev vurğulayıb ki, Çindən Azərbaycana turist axınının artması da ölkə üçün yeni iqtisadi imkanlar açır: “Bununla yanaşı, texnologiya sahəsində Şərqi Asiya nəhənginin nailiyyətləri Bakının xüsusi marağına səbəb olur. Diplomatik münasibətlərə toxunduqda isə Prezident İlham Əliyevin Çində yüksək səviyyədə qarşılanması, keçirilən danışıqlar və bu hadisələrin dünya mediasında geniş işıqlandırılması qarşılıqlı hörmət və rəğbətin bariz nümunəsidir.
Bakı ilə rəsmi Pekin arasında davamlı inkişaf edən əlaqələr hər iki ölkə üçün böyük perspektivlər vəd edir”.
Ləman Həsənova
18:40 26.04.2025
Oxunuş sayı: 1180
