Fond bazarındakı dəyişkənlik avropalı investorlar üçün nə vəd edir?
Son dövrlərdə fond bazarlarında müşahidə olunan dəyişkənlik avropalı investorların qərarlarına təsir göstərir. Lakin bu qeyri-sabitlik həm də yeni fürsətlər yaradır.
Crossmedia.az xarici mediaya istinadən bildirir ki, investorların inamı bazarların hərəkətverici qüvvəsidir. İnamın əsas dayaq nöqtələri isə düzgün idarəetmə, dayanıqlı iqtisadi siyasət və proqnozlaşdırıla bilən bazar şərtləridir.
hazırkı volatillik – yəni qiymətlərin tez-tez və sürətlə dəyişməsi – bəzi avropalı investorlar üçün riskli görünsə də, bu vəziyyət qiyməti düşmüş sektorlar üçün əlverişli giriş imkanları yarada bilər. Son illərdə investorların ABŞ birjalarına marağı artsa da, hazırda diqqətin yenidən yerli – yəni Avropa bazarlarına yönəldiyi müşahidə olunur.
Müdafiə sənayesində fəaliyyət göstərən BAE Systems, Thales və Rheinmetall kimi şirkətlərə maraq artır. Eyni zamanda, sabit gəlir gətirən səhiyyə nəhəngləri – Novo Nordisk, AstraZeneca və Roche – daha az iqtisadi təsirə məruz qaldıqları üçün investorların diqqətini çəkir. Nestle, Unilever və L’Oreal kimi şirkətlər isə sabit pul axını ilə risklərə qarşı müəyyən müdafiə təklif edir.
Digər tərəfdən, Çin istehsalına tətbiq edilən tariflər bəzi Avropa sektorlarında qeyri-müəyyənlik yaratsa da, Çin elektrik avtomobillərinin ABŞ-dan sıxışdırılması Volkswagen, BMW və Stellantis kimi Avropa istehsalçıları üçün yeni imkanlar aça bilər.
Uzunmüddətli baxışla müxtəlif keyfiyyətli şirkətlərə tədricən sərmayə qoymaq ağıllı strategiya hesab olunur. Ekspertlər fərdi səhmlərdənsə, kollektiv investisiya fondlarına üstünlük verilməsini və riskli sərmayələrin ənənəvi alətlərlə tarazlaşdırılmasını tövsiyə edirlər. Bu yanaşma həm mümkün itkiləri azalda, həm də bazardakı dəyişikliklərə daha çevik reaksiya verməyə imkan yarada bilər.
Zəhra Ağayeva
13:15 12.04.2025
Oxunuş sayı: 1394
