Ermənistan XİN-dən minalarla bağlı mühüm açıqlama: Hiylə, ya səmimiyyət?
Ermənistan Xarici İşlər Nazirliyinin mətbuat katibi Ani Badalyan bildirib ki, Ermənistan Azərbaycana beynəlxalq ekspertləri cəlb etməklə verilmiş mina xəritələrinin düzgünlüyünü yoxlamağa hazırdır.
“Bizim dəfələrlə “daha yaxşı və ya daha dəqiq” xəritələrin olmadığı barədə açıqlamalarımıza baxmayaraq, Azərbaycan bu xəritələrin düzgünlüyünü ardıcıl olaraq şübhə altına alıb. Ermənistan həm əvvəllər, həm də indi beynəlxalq ekspertləri cəlb etməklə bu xəritələrin düzgünlüyünü yoxlamağa hazırdır”, - o bildirib.
Məlum olduğu kimi, Ermənistan indiyə kimi bir neçə dəfə minalı ərazilərin xəritəsini Azərbaycana təhvil verib. Amma həmin topoqrafik məlumatların dəqiqliyi çox azdır. Bu isə mina təhlükəsinin tamamilə aradan qalxmasına əngəl yaratmaqla yanaşı, həm də Qarabağa köçə mane olur.
A.Badalyanın dedikləri nəyə işarədir? Bununla rəsmi İrəvan əslində xəritələrin qeyri - dəqiq olduğunu etiraf edir, yoxsa konstruktiv sərgiləyir?
Bu barədə Crossmedia.az-a açıqlama verən hərbi ekspert Ramil Məmmədli söyləyib ki, Ermənistan rəsmisinin açıqlamasını bir neçə cəhətdən qiymətləndirmək olar: "Yəni açıqlamaya birmənalı yanaşmaq olmaz. Amma əsas məsələ bu deyil. Əsas məsələ odur ki, 2020-ci il sentyabrın 27-ə qədər və 2020-ci il noyabrın 10-dan 2023-cü ilin sentyabrınadək olan dövrdə Ermənistan ordusu Qarabağ ərazisində-işğal altında saxladığı torpaqlarda minalanma prosesini davam etdirib. Bu, həm Vətən müharibəsi dövründə, həm də ondan sonrakı antiterror tədbirlərinə qədərki müddətdə baş verib. Ümumiyyətlə, mina xəritələri təkcə Ermənistanla Azərbaycan arasında ikitərəfli qaydada müzakirə olunmalı məsələ deyil. Bu prosesdə beynəlxalq təşkilatların iştirakı təmin edilməlidir. Ermənistan humanitar sahədə insanların həyat və sağlamlığına qarşı cinayətlər törədir və bu, humanizm prinsiplərinə ziddir. Beynəlxalq təşkilatlar bu əməllərə hüquqi qiymət verməlidirlər".
Müsahibimiz, həmçinin söyləyib ki, hazırda həmin ərazilərdə mülki şəxslər yaşayır və bu, ciddi təhlükə yaradır: "Ermənistanın mina xəritələrini təqdim etməməsi ciddi problem yaradır. Üstəlik, təqdim edilən xəritələrin də tam doğru və dəqiq olması şübhə doğurur. Çünki həm 1990-cı illərdə, həm də 2020–2022-ci illərdə Ermənistan tərəfinin hazırladığı xəritələrin etibarlılığı inandırıcı görünmür”.
Fidan Xəlilova
16:02 09.04.2025
Oxunuş sayı: 8357
