Azərbaycan-Somali təhsil əməkdaşlığı digər Afrika ölkələri üçün də nümunə ola bilər
Azərbaycan və Somali arasında təhsil sahəsində əməkdaşlığın genişləndirilməsi istiqamətində mühüm addım atılıb. İkitərəfli münasibətlərdə təhsilə xüsusi əhəmiyyət verildiyini vurğulayan rəsmilər, bu sahədə ilkin nailiyyətlər əldə olunduğunu bildiriblər.
Məlumata görə, hazırda Somalidən olan bir sıra tələbələr Heydər Əliyev adına təqaüd proqramı çərçivəsində Azərbaycanda təhsil alır. İmzalanmış yeni sənəd isə onların sayını artırmağa imkan verəcək. İlkin mərhələdə 10 somalili tələbənin Azərbaycanda təhsil alması nəzərdə tutulur, gələcəkdə isə bu rəqəmin daha da artacağı gözlənilir.
Bununla yanaşı, Azərbaycan tərəfi ölkəyə sərmayələrin cəlb edilməsi və müsbət işgüzar mühitin yaradılması sahəsindəki təcrübəsini də somalilərlə bölüşüb. Bu əməkdaşlığın Somalinin iqtisadi inkişafına töhfə verəcəyi və iki ölkə arasında əlaqələri daha da möhkəmləndirəcəyi gözlənilir.
Azərbaycan ilə Afrika ölkələri arasında əlaqələr yeni mərhələyə qədəm qoyur. Bu barədə Milli Məclisin deputatı Ceyhun Məmmədov Crossmedia.az-a açıqlamasında bildirib. Onun sözlərinə görə, Azərbaycan xarici siyasətində Afrika ölkələri ilə münasibətlərin inkişafına xüsusi önəm verir.
“Bu gün biz Azərbaycanın xarici siyasətində Afrika ölkələri ilə yeni bir səhifənin açıldığını görürük. Artıq dəfələrlə Azərbaycanın Afrika dövlətləri ilə əlaqələri daha da inkişaf edir. Tədricən Afrika ölkələrinin liderlərinin Azərbaycana səfərlərini müşahidə edirik. Eyni zamanda, Azərbaycan artıq Somali ilə də əlaqələrini genişləndirir. Bu əlaqələr bir neçə istiqamətdə inkişaf edəcək”, – deyə deputat vurğulayıb.
Ceyhun Məmmədovun sözlərinə görə, bu əməkdaşlıq çərçivəsində təhsil sahəsi mühüm yer tutur. “Somali müsəlman dövləti olduğu və yeni formalaşan bir dövlət kimi dirçəliş mərhələsində olduğu üçün Azərbaycanla əməkdaşlıq onun inkişafına töhfə verəcək. Hal-hazırda Azərbaycanda dövlət hesabına somalili tələbələr təhsil alır. Söhbət 10 tələbədən gedir. Bu, digər Afrika ölkələri üçün də bir nümunə ola bilər”, – o qeyd edib.
Deputat Afrika ölkələri ilə əlaqələrin inkişafının zəruriliyini vurğulayaraq bildirib ki, bu istiqamətdə əməkdaşlıq yeni fürsətlər yaradır: “Digər ölkələrin vətəndaşlarının da Azərbaycana gələrək burada təhsil almaq imkanı əldə etməsi üçün yeni fürsətlər yaranır. Bu əməkdaşlıq gələcəkdə elm, tədqiqat və digər sahələrdə də əlaqələrin inkişafına təkan verəcək. Eyni zamanda, elmi araşdırmaların və birgə layihələrin icrasına da müsbət təsir göstərəcək”.
O, Azərbaycan universitetlərinin beynəlxalq reytinqinə də toxunub və bildirib ki, xarici tələbələrin sayının artması bu göstəricilərə müsbət təsir edəcək: “Universitetlərin beynəlxalq reytinqi müəyyən edilərkən əsas meyarlardan biri xarici tələbələrin sayıdır. Hazırda Azərbaycan universitetlərində təxminən 10 minə yaxın əcnəbi tələbə təhsil alır. Lakin Azərbaycanın potensialı daha böyükdür və bu sahədə inkişaf etmək üçün geniş imkanlar mövcuddur”.
Sonda Ceyhun Məmmədov qeyd edib ki, bu səfər çərçivəsində imzalanan sənədlər xüsusilə elm və təhsil sahəsində Azərbaycanın nailiyyətlərinin artmasına mühüm töhfə verəcək. “Azərbaycan bu cür əlaqələrlə yeni uğurlar və nailiyyətlər əldə edəcək və biz ölkəmizin bu istiqamətdə irəlilədiyinin şahidi olacağıq”, – deputat vurğulayıb.
Nihat Tahirov
14:21 14.02.2025
Oxunuş sayı: 20958
