Güclü sel Gyirong Portu tamamilə dağıtdı
Çin-Nepal sərhədində yerləşən Gyirong Port avqustun 26-da baş verən torpaq sürüşməsi və güclü sel nəticəsində tamamilə dağılıb.
Crossmedia.az xəbər verir ki, CNN bu barədə məlumat yayıb.
CNN əməkdaşları sentyabrın 6-da Çin hökumətinin təşkil etdiyi səfər çərçivəsində fəlakət zonasına daxil olublar. Onların müşahidəsinə görə, vaxtilə sərhəd-keçid məntəqəsinin yerləşdiyi ərazidə hazırda yalnız daş, çınqıl və palçıq qalıb.
Ərazidə xilasetmə işləri davam etdirilir. Torpağın hələ də qeyri-sabit olması və yeni sürüşmə təhlükəsi səbəbindən jurnalistlərə qoruyucu dəbilqə və çəkmələr verilib.
Gyirong Port əvvəllər Çin və Nepal arasında turistlərin və tacirlərin hərəkət etdiyi əsas sərhəd-keçid məntəqələrindən biri olub. Hər gün yüzlərlə insan çayın o biri tərəfində yerləşən Nepalın Rasuva sərhəd-keçid məntəqəsinə gedib-gəlirdi.
Avqustun 26-da ərazi güclü su axınının təsirinə məruz qalıb. Torpaq sürüşməsi və sel əvvəlcə Gyirong Porta, daha sonra isə Nepal ərazisinə doğru yayılıb. Fəlakət zamanı insanların həyatlarını xilas etmək üçün qaçdığı müşahidə kameralarının görüntülərində əks olunub.
Gyirong Portda hadisədən sonra sağ qalan şəxslər aşkarlanmayıb. Sərhəd-keçid məntəqəsində yaxınlarının olduğunu düşünən ailələr isə hələ də onlardan xəbər gözləyirlər.
Fəlakət bölgəsində havanın toz və dumanla örtüldüyü, çoxsaylı xilasetmə texnikasının ərazidə çalışdığı bildirilir. Tamamilə dağılan yolun hərəkət üçün yararlı vəziyyətə gətirilməsi məqsədilə üzərinə çınqıl tökülüb.
Həlak olanların xatirəsinə ərazidə təxminən 100 sarı güldən ibarət müvəqqəti memorial yaradılıb. Dağıntıların üzərində Çin bayrağı da yerləşdirilib.
20:11 06.09.2026
Oxunuş sayı: 51
