Xarici xəbərlər

“Hazır deyilik”: Avropanın müharibə planları sual altında

NATO ilə əməkdaşlıq edən müdafiə planlaşdırıcıları hesab edirlər ki, Rusiya ilə müharibə başlayacağı təqdirdə Avropa hazırda uzunmüddətli tükəndirmə müharibəsini davam etdirmək imkanına malik deyil.

Crossmedia.az xəbər verir ki, bu barədə “The Guardian” Avropanın hərbi koordinasiyasının gələcəyinə həsr olunan konfransda səsləndirilən fikirlərə istinadən məlumat yayıb.

Müdafiə rəsmilərinin fikrincə, Avropa cəmiyyətlərinin uzunmüddətli müharibəyə hazır olmaması NATO-nun planlaşdırma imkanlarını məhdudlaşdırır. Onlar hesab edirlər ki, Rusiya Avropa ilə “hibrid müharibə”də müəyyən üstünlük əldə edə və bununla mümkün hərbi qarşıdurma zamanı NATO-nun seçimlərini zəiflədə bilər.

Bundan əlavə, Avropanın əsas hərbi dövlətlərində populist qüvvələrə dəstəyin artması ABŞ-ın Avropanın ənənəvi müdafiəsinə ayırdığı resursları azaltmağa hazırlaşdığı bir vaxtda yeni hərbi koordinasiya mexanizminin yaradılması planlarını da təhlükə altına qoyur.

Münhen Təhlükəsizlik Konfransının keçirdiyi forumda çıxış edən rəsmilər bildiriblər ki, Avropa ictimaiyyətinin uzunmüddətli müharibəyə dəstək verməyə hazır olub-olmadığı sual altındadır. Bu səbəbdən NATO-nun planlarını nisbətən qısa müddətli münaqişə ssenarisinə uyğunlaşdırması tələb oluna bilər.

Britaniyanın keçmiş kabinet üzvlərindən biri Qərbin Rusiya ilə hibrid qarşıdurmanın miqyası barədə cəmiyyəti məlumatlandırmaqda “çox pis” fəaliyyət göstərdiyini deyib. Digər britaniyalı diplomat isə ardıcıl hökumətlərin təhlükənin miqyasını ictimaiyyətə izah etmək üçün kifayət qədər addım atmadığını bildirib.

Onun sözlərinə görə, bu vəziyyət hökumətləri müdafiə xərclərini artırmaq üçün sosial təminat xərclərinin azaldılmasına hazır olmayan seçiciləri inandırmaq kimi çətin vəzifə qarşısında qoyub. Diplomat Avropada təhlükəsizliklə bağlı ictimai müzakirələrin səviyyəsini də sərt şəkildə tənqid edib.

🖨 Çap et

17:46 05.09.2026

Oxunuş sayı: 199