ABŞ kəşfiyyatı: Putin Amerikanı zəifləmiş hesab edir
ABŞ kəşfiyyatının məlumatlarına görə, Rusiya Prezidenti Vladimir Putin İranla altı aylıq müharibə fonunda ABŞ-nin zəiflədiyini düşünür və bunu Avropada ABŞ-nin maraqları və müttəfiqlərinə qarşı fəaliyyətini gücləndirmək üçün fürsət kimi qiymətləndirir.
Crossmedia.az xəbər verir ki, “The Washington Post” bu barədə məlumat yayıb.
Məlumata görə, bu qiymətləndirmələr ABŞ Mərkəzi Kəşfiyyat İdarəsinin direktoru Con Retkliffin Moskvaya səfərindən əvvəl əldə edilib. “The Wall Street Journal” isə Retkliffi Moskvaya ABŞ Prezidenti Donald Trampın şəxsən göndərdiyini yazıb.
“The Washington Post”a danışan mənbələrdən biri bildirib ki, Retkliffin səfəri Putinin Ukrayna cəbhəsində vəziyyətə görə küncə sıxışdırılması ilə bağlı deyil. Mənbənin sözlərinə görə, Rusiya ABŞ-nin hərbi imkanlarının tükəndiyini və Vaşinqtonun müdaxilə edə bilməyəcəyini düşünür.
Retkliffin rusiyalı rəsmilərə Moskvanın Ukraynada müharibəni əhəmiyyətli dərəcədə genişləndirəcəyi təqdirdə bunun Trampı Ukrayna Prezidenti Vladimir Zelenskinin tərəfinə keçməyə sövq edə biləcəyini bildirdiyi qeyd olunur.
“The Wall Street Journal”ın məlumatına görə, Retkliff həmçinin ABŞ-nin NATO-nun kollektiv müdafiəsini nəzərdə tutan 5-ci maddəyə sadiqliyini Rusiya tərəfinə təsdiqləyib.
“The Washington Post”un mənbələri ABŞ kəşfiyyatının Putinin bu qiymətləndirmələri barədə məlumatları hansı yolla əldə etdiyini və CIA analitiklərinin onların doğruluğuna nə dərəcədə əmin olduğunu açıqlamayıb.
Məlumatlar ABŞ-nin İranla müharibə səbəbindən bəzi hərbi ehtiyatlarının tükənməsi ilə bağlı xəbərlərin fonunda yayılıb. Nəşr daha əvvəl ABŞ-nin “Patriot” hava hücumundan müdafiə sistemləri, “Tomahawk” və ATACMS raketləri də daxil olmaqla, bir sıra silah ehtiyatlarının azaldığını yazıb. Həmçinin ABŞ-nin “Reaper” pilotsuz uçuş aparatlarının təxminən dörddə birini itirdiyi bildirilib.
Bununla belə, ABŞ müdafiə naziri Pit Heqset və administrasiyanın digər nümayəndələri sursat çatışmazlığının ciddi həddə olduğunu açıq şəkildə təkzib edirlər.
12:19 28.08.2026
Oxunuş sayı: 43
