"Google", "Android 15" əməliyyat sisteminin yeniləməsini istifadəçilərə təqdim etməkdə gecikdi. Normalda avqust və ya sentyabrda çıxması gözlənilən bu yeniləmə, oktyabrın ortasında istifadəyə verildi. Hər zaman olduğu kimi, ilk olaraq "Pixel" cihazlarına təqdim edilən yeniləmə bir çox yeniliyi özündə birləşdirir. Keçən həftə isə "Google", "Android 15"dəki gecikməni "Android 16" ilə aradan qaldırmağı planlaşdırdığını açıqladı.
Adətən ilin üçüncü və dördüncü rübündə təqdim olunan "Android" versiyalarından fərqli olaraq, "Android 16"-nın 2025-ci ilin aprel və iyun ayları arasında təqdim ediləcəyi iddia olunur. Yeni sızıntılara əsasən, "Android 16"-nın təqdimat tarixi artıq müəyyən olub. Əldə edilən məlumata görə, yeni əməliyyat sistemi 3 iyun 2025-ci ildə təqdim ediləcək.
"Google"ın bu addımının arxasında isə, 2025-ci ilin avqust ayında tanıdılması gözlənilən "Pixel 10" seriyası üçün əməliyyat sisteminin sabit versiyasının istifadəyə verilməsi məqsədinin dayanması mümkündür. Hələlik "Google"ın bu yeniləməni nə qədər erkən təqdim edəcəyi barədə rəsmi açıqlama verilməyib, lakin bu sahədə işlərin sürətləndiyi görünür.
"Android 16" erkən yayımlandığı təqdirdə, digər cihaz istehsalçıları da bu yeniləməni öz telefonlarına tez bir zamanda tətbiq edərək istifadəçilərə təqdim edə bilərlər. Yeniliklərə və dəyişikliklərə nəzər saldıqda, Wi-Fi və Bluetooth funksiyalarında böyük yeniliklər ola bilər. Görünür, bir toxunuşla "Wi-Fi" və "Bluetooth" xüsusiyyətlərini açıb bağlama funksiyası yenidən təqdim ediləcək.
Emil Bağızadə
