Qırğızıstanın Bişkek şəhərində keçirilən Türk Dövlətləri Təşkilatı Dövlət Başçılarının 11-ci Zirvə görüşü çərçivəsində mühüm bir addım atıldı. Azərbaycan Mərkəzi Bankının sədri Taleh Kazımovun iştirakı ilə “Türk Yaşıl Maliyyə Şurası”nın yaradılması barədə memorandum imzalandı. Bu təşəbbüs Türk Dövlətləri Təşkilatına üzv ölkələr arasında yaşıl və dayanıqlı maliyyənin təşviqində mühüm rol oynayacaq.
Milli Məclisin deputatı Vüqar Bayramov Crossmedia.az-a verdiyi açıqlamada, Yaşıl Maliyyə Şurasının yaradılmasını Türk dövlətlərinin birgə yaşıl iqtisadiyyat təşəbbüsünün möhkəmləndirilməsi üçün mühüm addım kimi qiymətləndirib. O, bu addımın yaşıl maliyyə sahəsindəki problemlərin həllini sistemləşdirə biləcəyini və daha çox maliyyə resurslarının bu sahəyə ayrılmasına imkan yaradacağını bildirib.
Deputat, həmçinin Azərbaycanın yaşıl enerji potensialının Avropaya ixrac edilməsini vurğulayıb. Hazırda Azərbaycan yaşıl enerjisini Gürcüstan və Qara Dəniz vasitəsilə Avropa İttifaqına çatdırmaq planları üzərində işləyir. Bununla yanaşı, Mərkəzi Asiyanın yaşıl enerji mənbələrinin də Avropaya ixracı istiqamətində müzakirələr aparılır. Bu konteksdə Azərbaycanın tranzit rolunu oynayaraq, yaşıl enerjinin Avropaya daha geniş şəkildə çatdırılması üçün yeni imkanlar təmin edə biləcəyi qeyd olunub.
Vüqar Bayramov əlavə edib ki, Türk Dövlətləri Təşkilatı üzvləri yaşıl enerji ixracı sahəsində həmrəylik nümayiş etdirərək, bölgədə investisiya cəlbediciliyinin artırılmasına və investisiya mühitinin daha əlverişli olmasına dəstək ola bilər. Belə şuraların yaradılması, həmçinin, türk dövlətlərinin yaşıl iqtisadiyyatın inkişafında birgə fəaliyyətlərini gücləndirə və türk dünyasının regional mövqeyini möhkəmləndirə bilər. Nəticədə, Türk dövlətləri dünya enerji bazarında daha strateji mövqeyə yüksələ və ekoloji sabitlik yolunda ciddi nailiyyətlər əldə edə bilər.
Regional Enerji Bazarı və Dayanıqlı İnkişaf Perspektivləri
Qeyd edək ki, “Türk Yaşıl Maliyyə Şurası”nın yaradılması Türk dövlətlərinin regional enerji bazarının daha dayanıqlı inkişafına böyük töhfə verəcək. Bu təşəbbüsün uğurlu həyata keçirilməsi nəticəsində, Türk dövlətlərinin yaşıl enerji sahəsində lider ölkələrə çevrilməsi və beynəlxalq arenada nüfuzunun artırılması gözlənilir.
Nihat Tahirov
