Rusiyanın təyyarə qəzası ilə bağlı üzr istəməsi müzakirə olunur - ŞƏRH
Rusiyanın Bakı-Qroznı reysini yerinə yetirən AZAL təyyarəsinin vurulması ilə bağlı rəsmi üzr istəməsi məsələsi gündəmin əsas mövzularından birinə çevrilib. Ekspertlər təyyarənin vurulmasını ciddi səhv adlandıraraq, Rusiyanın bu hadisə ilə bağlı açıq etirafının Azərbaycanla münasibətlərin qorunması üçün mühüm olduğunu bildiriblər.
Hadisənin təfərrüatlarına görə, təyyarənin Qroznıya yönləndirilməsi mümkün olduğu halda, Mahaçqala və ya digər alternativ hava limanlarına eniş də həyata keçirilə bilərdi. Lakin Qroznıya enişə icazə verilməməsi və təyyarənin Aktauya yönləndirilməsi qərarı ciddi suallar doğurur. Təyyarə Aktauya eniş edərkən qəzaya uğrayıb. Nəticədə göyərtədə olan 67 sərnişindən 38-i həyatını itirib, 29 nəfər isə sağ qalıb.
Siyasi ekspertlərin fikrincə, bu hadisənin etiraf olunması və Rusiyanın açıq üzr istəməsi Azərbaycan-Rusiya münasibətlərinin qorunması baxımından mühüm addım ola bilər.
Siyasi şərhçi Əziz Əlibəyli hadisə ilə bağlı Crossmedia.az-a açıqlamasında bildirib ki, “Rusiyanın yüksək rəhbərliyi tərəfindən bu məsələnin etiraf edilməsi siyasi və qlobal əhəmiyyət daşıyan nüanslardan xəbər verir. Dövlətlərarası münasibətlərdə belə addımlar gələcək istiqamətlərin müəyyən edilməsi baxımından vacibdir. Təbii ki, bu məsələyə müsbət yanaşmaq və düzgün qiymətləndirmək lazımdır”.
Prosesin uzanması, artıq üçüncü günə keçməsi, tərəflərin məsələyə aydın mövqe bildirməsi üçün vaxt tələb edir. Azərbaycan Prezident Administrasiyasının mətbuat xidmətindən verilən açıqlamada qeyd olunub ki, Azərbaycanın rəsmi mövqeyi faktlara əsaslanaraq ictimaiyyətə təqdim ediləcək. Rusiya tərəfinin qərarının isə gözlənildiyi vurğulanıb.
Eyni zamanda, Rusiya tərəfinin bu məsələyə dair addımlar atdığı müşahidə olunur. Xüsusilə, bu gün Rusiya Prezidenti Vladimir Putinlə Fövqəladə Hallar Nazirliyinin görüşü də bu hadisə ilə bağlı qərarların müzakirəsi kimi qiymətləndirilir.
Hadisənin diplomatik, hüquqi və siyasi nəticələri yaxın günlərdə daha da aydınlaşacaq.
Maral Şahverdili
12:34 27.12.2024
Oxunuş sayı: 24397
