Almaniyada səmadakı sirli obyektlərlə bağlı müraciətlər kəskin artıb
Almaniyada səmada müşahidə olunan naməlum obyektlər və işıqlı kürələrlə bağlı müraciətlərin sayı kəskin artıb.
Crossmedia.az xəbər verir ki, Almaniyanın “Euronews” nəşri bu barədə məlumat yayıb.
Qeyri-adi səma hadisələrinin araşdırılması ilə məşğul olan Mərkəzi Araşdırma Şəbəkəsi (CENAP) hazırda gündə 3-6 müraciət qəbul edir.
CENAP direktoru Hansyurgen Köler bildirib ki, qurum almandilli dünyada bu cür məlumatların qəbulu üzrə ən çox müraciət alan mərkəzdir. Onun sözlərinə görə, 2026-cı ilin avqust ayına qədər o və komandası bu tipli təxminən 14 min hadisəni araşdırıb.
Astronomiyaya uşaqlıqdan maraq göstərən Köler UFO fenomeni ilə gənclik illərində maraqlanmağa başlayıb. O bildirib ki, bu maraq rəsədxanada işlədiyi dövrdə insanlardan səmada qeyri-adi obyektlər gördükləri barədə çoxsaylı telefon zəngləri daxil olması ilə daha da artıb.
Kölerin astronomiyaya marağı 11 yaşında televiziyada insanın Aya enişini izlədikdən sonra yaranıb. 1973-cü ildə isə o, digər həvəskarlarla birlikdə arxiv materiallarını, o cümlədən ABŞ-dan İkinci Dünya müharibəsi dövrünə aid mikrofılmləri araşdırmağa başlayıb.
Kölerin sözlərinə görə, həmin müşahidələrin əksəriyyətinin təbii izahı olub. Bununla belə, bəzi fotolar, xüsusilə hərbi pilotların gördükləri obyektlərin nə olduğunu müəyyənləşdirə bilməməsi nəzərə alındıqda, kifayət qədər təsirli olub.
UFO mövzusuna maraq ABŞ hakimiyyətinin naməlum hava hadisələri (UAP) ilə bağlı materialları dərc etməsindən sonra yenidən artıb.
2020-ci ilin aprelində ABŞ Müdafiə Nazirliyi 2004 və 2015-ci illərdə hərbi pilotlar tərəfindən çəkilmiş üç videonun həqiqiliyini rəsmən təsdiqləyib. Videolarda mənşəyi həmin vaxt müəyyənləşdirilə bilməyən obyektlər əks olunub.
2022-ci ildə ABŞ Müdafiə Nazirliyinin nəzdində bütün sahələr üzrə anomal hadisələrin araşdırılması ilə məşğul olan AARO qurumu yaradılıb. Qurumun əsas vəzifələri UAP barədə məlumatları sistemli şəkildə araşdırmaq, milli təhlükəsizlik üçün potensial təhdidləri qiymətləndirmək və əvvəl qeydə alınmış hadisələri təhlil etməkdir.
Köler isə yayımlanan materiallarda CENAP mütəxəssisləri üçün prinsipial olaraq yeni heç nə olmadığını düşünür.
O, 2015-ci ilin yanvarında Kaliforniya sahilləri yaxınlığında F/A-18 qırıcısının təlim uçuşu zamanı çəkilən məşhur “Gimbal” videosunu nümunə göstərib.
İnfraqırmızı görüntüdə öz oxu ətrafında fırlandığı təəssüratı yaradan obyekt görünür. Pentaqon videonun həqiqiliyini təsdiqləsə də, obyektin mahiyyətini dəqiq müəyyənləşdirə bilməyib.
Köler hesab edir ki, görüntüdə hava şarı əks olunub. Onun fikrincə, obyektin böyük sürətlə hərəkət etməsi təəssüratı hava şarı ilə yüksək sürətlə uçan qırıcı arasındakı nisbi hərəkətdən yaranır.
O, həmçinin F/A-18 təyyarələrinin elektron müşayiət sistemlərindəki problemlərə diqqət çəkib və bu sistemlərin göstəricilərdəki səhvlərə görə dəfələrlə yeniləndiyini bildirib.
Kölerin fikrincə, belə rasional izahlar ilkin olaraq irəli sürülən “naməlum texnologiyalar” versiyaları qədər geniş yayılmır. O qeyd edib ki, sosial şəbəkələrdə və “X” platformasında əsassız iddialar xüsusilə çox yayılır.
Bununla belə, CENAP rəhbəri yadplanetli həyatın mövcudluğunu istisna etmir. O bildirib ki, kainatın hansısa yerində həyatın mövcud olması mümkündür, lakin bunun yüksək texnologiyaya malik canlıların qalaktikalararası səyahət edərək Yerə gəlməsi və burada qəzaya uğraması anlamına gəlmədiyini vurğulayıb.
CENAP bəzən müşahidələrin əksəriyyətini adi səbəblərlə izah etdiyi üçün həddindən artıq skeptik olmaqda tənqid edilir. Qurumun tərəfdarları isə məhz bu yanaşmanı onun əsas üstünlüyü hesab edirlər. Mütəxəssislər müşahidələri təsnifləndirərək həqiqətən izahı olmayan hadisələri qavrayış səhvlərindən və digər adi səbəblərdən ayırmağa çalışırlar.
Kölerin sözlərinə görə, UFO kimi qəbul edilən obyektlərin əksəriyyəti təyyarələr, helikopterlər, raket pillələri, peyklər, meteorlar, parlaq bolidlər, planetlər və ulduzlar olub.
Siyahıda meteoroloji və digər hava şarları, həmçinin tədbirlərdə istifadə olunan lazerlər də yer alır. Lazer şüaları bir neçə kilometr məsafədə yayıldıqda qeyri-adi görüntü yarada bilər.
Bununla belə, CENAP-ın bəzi hadisələrin səbəbini müəyyənləşdirməsi mümkün olmayıb. Köler vurğulayıb ki, hadisənin izahının tapılmaması onun yadplanetlilərlə əlaqəli olduğunu təsdiqləmir.
Onun sözlərinə görə, müşahidənin tam araşdırılması üçün ən azı hadisənin tarixi, dəqiq vaxtı və yeri, səmada istiqaməti, mümkün olduqda isə foto və ya video görüntülər lazımdır.
Mütəxəssislər obyektlərin müstəqil şəkildə müəyyənləşdirilməsi üçün smartfonun kamerasını səmadakı obyektə yönəltməklə onun nə olduğunu müəyyən etməyə imkan verən pulsuz astronomiya tətbiqlərindən istifadə etməyi tövsiyə edirlər.
00:30 10.08.2026
Oxunuş sayı: 39
