Seymur Nəsirov: Hər il avqustun 1-də Azərbaycan Əlifbası və Azərbaycan dili Gününü qeyd edirik
Hər il avqustun 1-i Azərbaycan Respublikasında mühüm əlamətdar günlərdən biri – Azərbaycan Əlifbası və Azərbaycan Dili Günü kimi qeyd olunur. Bu gün ana dilinə ehtiramın ifadəsi olmaqla yanaşı, Azərbaycan dilinin xalqımızın milli kimliyinin, zəngin mədəni irsinin və sivilizasiya tarixinin əsas dayaqlarından biri olduğunu bir daha təsdiqləyir. Bu fikirləri Misirdəki Azərbaycan diasporunun rəhbəri, tədqiqatçı alim Seymur Nəsirov Misirin ən qədim və nüfuzlu media qurumlarından biri olan “Rosa El-Youssef” nəşrinə müsahibəsində səsləndirib.
Crossmedia.az xəbər verir ki, Seymur Nəsirovun sözlərinə görə, bu günün qeyd olunmasında əsas məqsəd Azərbaycan dilinin tarixi və mədəni əhəmiyyətini ön plana çıxarmaq, əlifbamızın keçdiyi inkişaf mərhələlərini tanıtmaq, eyni zamanda ana dilinin qorunmasının vacibliyi ilə bağlı ictimai şüuru daha da gücləndirməkdir. O vurğulayıb ki, Azərbaycan dili xalqımızın tarixini, mədəniyyətini və milli yaddaşını gələcək nəsillərə çatdıran ən mühüm vasitələrdən biridir.
Tədqiqatçı alim bildirib ki, ana dilinə qayğı göstərilməsi milli kimliyin qorunmasının əsas şərtlərindəndir. Onun sözlərinə görə, Azərbaycan dövləti öz dilinin inkişafına və mədəniyyətinin təbliğinə xüsusi önəm verir, Azərbaycan dilinin istifadəsini və beynəlxalq səviyyədə tanıdılmasını həm ölkə daxilində, həm də xaricdə ardıcıl şəkildə dəstəkləyir. Bu siyasət Azərbaycanın zəngin mədəni və sivilizasiya irsinin dünya ictimaiyyətinə daha geniş təqdim olunmasına xidmət edir.
Müsahibənin sonunda Seymur Nəsirov vurğulayıb ki, dil yalnız ünsiyyət vasitəsi deyil, həm də xalqların milli kimliyini ifadə edən, onların tarixi və sivilizasiya dəyərlərini yaşadan əsas amillərdən biridir. Azərbaycan Əlifbası və Azərbaycan Dili Gününün qeyd olunmasını xalqımızın ana dilinə və mədəni irsinə göstərdiyi yüksək ehtiramın, eyni zamanda bu irsin qorunaraq gələcək nəsillərə ötürülməsinə verilən önəmin bariz nümunəsi kimi dəyərləndirib.
Seymur Nəsirovun “Rosa El-Youssef” nəşrinə verdiyi müsahibə ilə aşağıdakı keçid vasitəsilə tanış ola bilərsiniz:
https://www.rosaelyoussef.com/1420882
16:07 04.08.2026
Oxunuş sayı: 49
