Sosial ödənişlər arasındakı fərqlər aradan qaldırılmalıdır - AÇIQLAMA
2025-ci ilin yanvar ayından etibarən Azərbaycanda minimum əməkhaqqı 400 manat, minimum pensiya isə 320 manat olacaq. Bu qərar əhalinin sosial rifahının artırılması istiqamətində atılmış mühüm addımlardan biri kimi qiymətləndirilir. Artım əhalinin böyük hissəsini əhatə edir və azgəlirli təbəqələrin sosial təminatını yaxşılaşdırmağı hədəfləyir.
Mövzu ilə bağlı Crossmedia.az-a açıqlama verən Milli Məclisin deputatı Vüqar Bayramov bildirib:
“Minimum əməkhaqqının və minimum pensiyanın artırılması sosial siyasət baxımından çox vacib addımlardan biridir. Bu artımlar həm az əməkhaqqı və pensiya alan vətəndaşlarımızın sosial təminatının gücləndirilməsi baxımından mühüm rol oynayır, həm də dövlət və qeyri-dövlət sektorlarında çalışan insanların gələcəkdə daha yüksək əməkhaqqı və pensiya alma ehtimallarını artırır.”
Deputat əlavə edib ki, əməkhaqqı artımları azgəlirli təbəqələr üçün mühüm sosial dəstəkdir və bu dəyişikliklər 700 mindən çox vətəndaşı əhatə edəcək:
“Minimum əməkhaqqının artırılması azgəlirli təbəqələr üçün mühüm sosial dəstəkdir. Minimum pensiyanın artırılması isə nisbətən az pensiya alan vətəndaşlarımızın gündəlik ehtiyaclarını daha yaxşı qarşılamaq üçün əhəmiyyətli dəyişiklikdir. Bu artımların əhəmiyyəti təkcə hazırkı sosial təminatın yaxşılaşdırılması ilə məhdudlaşmır. Həmçinin, bu dəyişikliklər gələcəkdə dövlət və özəl sektorda çalışan insanların əmək bazarındakı gəlir perspektivlərini də artırır.”
Vüqar Bayramov sosial ödənişlər və pensiya kapitalı ilə bağlı mexanizmlərin yenidən nəzərdən keçirilməsinin vacibliyini də vurğulayıb:
“Digər tərəfdən, sosial ödənişlər arasındakı fərqlərin aradan qaldırılması və daha ədalətli rəqəmlərin tətbiq olunması mühüm məsələlərdən biridir. Bu istiqamətdə müzakirələrin aparılması məqsədəuyğun olardı. Çünki nəticə etibarilə minimum əməkhaqqı ilə sosial ödənişlər arasındakı fərqin ya tamamilə aradan qaldırılması, ya da minimum səviyyəyə endirilməsi daha ədalətli sistemin qurulmasına imkan verəcəkdir.”
Deputatın fikrincə, bu sahədə islahatların davam etdirilməsi, iqtisadi və sosial siyasətin əsas hədəflərindən biri olmalıdır. Bu dəyişikliklər uzunmüddətli perspektivdə əhalinin həyat keyfiyyətinin daha da yüksəlməsinə xidmət edəcək.
Maral Şahverdili
17:20 26.12.2024
Oxunuş sayı: 4534
