Ağ Ev risk etmədi: Trampın İran planı təxirə salındı
ABŞ Prezidenti Donald Tramp hələlik İranla silahlı qarşıdurmanı kəskin şəkildə genişləndirmək planından imtina edib.
Crossmedia.az xəbər verir ki, bu barədə The New York Times mənbələrə istinadən məlumat yayıb.
Məlumata görə, belə qərarın əsas səbəblərindən biri Pentaqonun Yaxın Şərqdə yerləşdirdiyi Patriot zenit-raket kompleksləri və digər hava hücumundan müdafiə sistemləri üçün nəzərdə tutulan raket ehtiyatlarının azalması ilə bağlı narahatlıq olub.
Nəşrin yazdığına görə, Ağ Evdə daha genişmiqyaslı hərbi əməliyyatın ciddi risklər yaradacağı qənaətinə gəlinib. Trampın müşavirləri münaqişənin regionun digər ölkələrinə yayılması, ABŞ-in Fars körfəzi müttəfiqləri ilə münasibətlərinin gərginləşməsi, həmçinin qlobal iqtisadiyyat üçün mümkün nəticələr, o cümlədən enerji böhranı və qaçqın axınının artması ehtimalından ehtiyat ediblər.
Məlumatda qeyd olunur ki, İran ABŞ-in İraqın Baş naziri vasitəsilə göndərdiyi atəşkəs təklifini qəbul etməyib. Tehran müvəqqəti razılaşmanın Hörmüz boğazına nəzarət məsələsini həll etmədiyini bildirərək bu variantda maraqlı olmadığını bəyan edib.
İran rəsmilərinin sözlərinə görə, ölkənin silahlı qüvvələri kritik infrastruktur obyektlərinə zərbələr endiriləcəyi təqdirdə müharibənin daha da genişlənməsinə hazırlaşır.
Xatırladaq ki, daha əvvəl İran ABŞ-in Bəhreyndə yerləşən hərbi bazasına hücum etmişdi.
09:00 26.07.2026
Oxunuş sayı: 49
