Sosium

Təbiətin hədiyyələri paytaxtda: “Kənddən Şəhərə”- Yarmarkadan reportaj

Dekabrın 21-i səhər saatlarında Bakının Nərimanov rayonu, Fətəli xan Xoyski küçəsi 5 ünvanında Kənd Təsərrüfatı Nazirliyi tərəfindən “Kənddən şəhərə” Yeni il yarmarkası açılıb. Dünya Azərbaycanlılarının Həmrəyliyi Günü və Yeni il bayramı münasibətilə təşkil olunan yarmarka 30 dekabr tarixinədək 10 gün müddətində davam edəcək.
“Kənddən Şəhərə” yarmarkası Azərbaycanın kənd təsərrüfatı məhsullarının daha geniş auditoriyaya çatdırılması və şəhər sakinlərinin təbii, keyfiyyətli məhsullara birbaşa çıxışının təmin olunması məqsədini daşıyan layihədir. Bu yarmarka adətən paytaxt Bakıda və digər böyük şəhərlərdə təşkil edilir.

Crossmedia.az saytının əməkdaşları ətraflı məlumat toplamaq üçün yarmarkaya üz tutublar.

İçəri daxil olduqda yarmarkanın gurultulu və rəngarəng bir tədbir şəklində davam etdiyi müşahidə olunur. Şəhər sakinlərinin çoxdandır gözlədiyi bu yarmarka həm alıcıların, həm də kənd təsərrüfatı istehsalçılarının üzündə sevinc yaratmağa nail olub. Yarmarkada Kəlbəcərin balından Lənkəranın çayı, Qaxın fındığından Cəlilabadın narına qədər saysız-hesabsız məhsullar burada bir araya gəlib. Satıcıların sevinc dolu səsləri və alıcıların razı söhbətləri meydanı bəzəyir.

Şəhər sakini Zeynəb Əliyeva bildirib ki, hər dəfə bu yarmarkanı səbirsizliklə gözləyir:
“Məhsulların hamısı təbii kənd məhsullarıdır, qiymətlərdə çox münasibdir”.

İsmayıllı rayonundan gələn fermer Rövşən Novruzov bildirib ki, məhsullarımızı münasib qiymətlərlə, bazar qiymətindən aşağı təklif edirik:
“Kənd Təsərrüfatı Nazirliyinin dəstəyinə görə minnətdarıq. Onların yaratdığı şərait sayəsində işləyirik, hər şey təmin olunub, əlavə xərclər yoxdur. Hər şeydən razıyıq”.

Digər satıcının sözlərinə görə burada yer pulunun alınmaması ən yaxşı tərəfidir:

“Vitrin, müştəri paketləri, hətta çay belə təşkilatçılar tərəfindən təmin edilir. İstilik sistemi də yaxşıdır. Şəraitimizdən razıyıq, çünki qapalı məkandır”.

"Aqrar tədarük və təchizat" Açıq Səhmdar Cəmiyyətinin nümayəndəsi Asiman Aslanova isə Crossmedia.az saytına açıqlamasında bildirib ki, Kənd Təsərrüfatı Nazirliyinin tabeliyində "Aqrar tədarük və təchizat" ASC təşkilatçılığı ilə təşkil olunan "Kənddən Şəhərə" Yeni il yarmarkasının artıq bu gün üçüncü günüdür və 30 dekabr saat 09:00-dan 19:00-dək fəaliyyət göstərəcək:
"Yarmarkada satışa çıxarılan məhsulların keyfiyyətinə Azərbaycan Qida təhlükəsizliyi Agentliyi nəzarət edir. Yarmarkanın girişində səyyar qida laboratoriyası fəaliyyət göstərir. Vətəndaşlar həmin xidmətlərdən də yararlana bilərlər. Ümumilikdə isə burada 30 rayon və şəhərdən 100-ə yaxın fərmer 100-dən çox çeşiddə kənd təsərrüfatı və qida məhsullarının satışını həyata keçirirlər. Qeyd etmək lazımdır ki, yarmarkada bütün xidmətlər fermerlər üçün ödənişsiz şəkildə təşkil olunur. Onlar ödənişsiz şəkildə piştaxta, tərəzi və digər lazımi avadanlıqlarla təmin olunurlar. Həmçinin bu il bəzi yeniliklərimiz də var, belə ki, uşaqlar üçün oyun meydançası qurulub və sosial media müsabiqələri həyata keçirilir. Demək olar ki, yarmarkada vətəndaşlar üçün bütün xidmətlər təşkil olunur".

Gülşad İbrahimova
Gülay Məmmədova