Almaniyada hökumət böhranı və Ştaynmayerin gözlənilən çıxışı
Avropa siyasətində sabitlik simvolu hesab edilən Almaniya hazırda ciddi siyasi çətinliklərlə üzləşir. Ölkə tarixində nadir hallarda rast gəlinən dərin hökumət böhranı gündəmə gəlib. Son aylarda kansler Olaf Şoltsun rəhbərliyi ilə fəaliyyət göstərən koalisiya hökumətində qarşıdurmalar və idarəçilikdə çətinliklər ictimaiyyətin və siyasətçilərin narazılığına səbəb olub. Bunun fonunda Almaniya Prezidenti Frank-Valter Ştaynmayerin Bundestaqın buraxılması ilə bağlı gözlənilən bəyanatı siyasi arenada əsas müzakirə mövzusuna çevrilib.
Bu vəziyyəti sadəcə hökumət böhranı kimi qəbul etmək mümkündürmü, yoxsa bu, daha dərin siyasi və sosial dəyişikliklərin göstəricisidir?
Mövzu ilə bağlı Crossmedia.az-a açıqlamasında siyasi ekspert Oqtay Qasımov bildirib ki, Almaniyada baş verənlər hökumət böhranı kimi qiymətləndirilə bilər.
Ekspertin sözləri görə, hətta artıq Almaniya Kansleri vəzifəsində qalmaqda çətinliklər yaşanır, parlamentdə isə etimadsızlıq ifadə olundu və nəticədə Almaniya Prezidenti və işçilər mövcud vəziyyəti təsdiqlədilər. Əslində, hadisələrin bu istiqamətdə inkişaf edəcəyi əvvəlcədən proqnozlaşdırıla bilərdi. Çünki hazırda Almaniya iqtisadiyyatında son illərdə baş verən geriləmələr, iqtisadi inkişaf tempinin ciddi şəkildə zəifləməsi, digər tərəfdən isə Rusiya-Ukrayna müharibəsinin Almaniya iqtisadiyyatına təsiri çox ciddi məsələlərdir.
O, əlavə edib ki, bundan başqa, Almaniyanın iqtisadi problemləri ilə yanaşı, digər sosial məsələlər, xüsusən miqrasiya ilə bağlı problemlər də mövcuddur. Bu problemlər iqtisadi, siyasi və sosial vəziyyətin ağırlaşmasına gətirib çıxarıb və Almaniyada saxta xəbərlərin yayılmasına səbəb olub. Eyni zamanda, Almaniyanın alternativ partiyalarının reytinqi artmaqdadır. Bu reytinq artımı Amerika Birləşmiş Ştatlarında Donald Trampın hakimiyyətə gəlməsindən sonra daha çox hiss olunmağa başlayıb.
Oqtay Qasımovun sözlərinə görə, mövcud şərait göstərir ki, fevralda keçiriləcək seçkilərdə Xristian Demokratların qalib gəlmək şansları kifayət qədər yüksək qiymətləndirilir. Artıq Almaniyanın özündə hakim siyasi qüvvə də bu reallığı qəbul etməyə başlayır. Bu baxımdan götürsək, Avropanın Rusiya-Ukrayna müharibəsindən daha çox təsirləndiyini demək olar. Bu təsirlər özünü seçki nəticələrində də göstərir.
“Hesab edirəm ki, növbədənkənar seçkilər Olaf Şolts hökumətinin və koalisiyanın məğlubiyyəti ilə nəticələnəcək. Xristian Demokratlar isə əsasən daha güclü siyasi qüvvə kimi önə çıxacaqlar. Hazırkı şəraitdə onların hakimiyyətə gəlmə şansı daha yüksək qiymətləndirilir”, – deyə ekspert bildirib.
Gültac Mehdizadə
16:29 25.12.2024
Oxunuş sayı: 18136
