Azərbaycanda saxta diplomlarla mübarizə gücləndirilir
Azərbaycanda saxta diplomlar cəmiyyətin diqqət mərkəzindədir. Hüquqi və texnoloji tədbirlərin gücləndirilməsinə baxmayaraq, bu mövzu hələ də aktual olaraq qalır. Ölkədə məsələ ilə bağlı mübarizə istiqamətində ciddi addımlar atılmaqdadır.
Mövzu ilə bağlı təhsil eksperti İlqar Orucov Crossmedia.az-a açıqlama verib.
Onun sözlərinə görə: “Ölkəmizdə saxta diplom bazarı kifayət qədər vüsət almayıb. Bu kimi hallar hər zaman olub. Bizim ölkədə belə vəziyyətlərdə həmin şəxslər hüquqi yolla cəzalanacaqlar. Bu bir cinayət əməlidir. Azərbaycanda diplomun saxta olub-olmamasını müəyyənləşdirmək asandır. Əvvəlki illərdə belə hallarla çox qarşılaşırdıq. Lakin indi düşünmürəm ki, bu cür situasiya artsın. Sadəcə olaraq Azərbaycan çox doğru platformaya( “Elektron Hökümət Portalı”) start verib. Elm və Təhsil nazirliyi və müvafiq dövlət qurumları hamısı sistemə transfer olunub. Düzdür bütün diplomlu şəxslərin diplomunu biz orda görə bilmirik. Ümid edirəm ki, bu məsələ də gələcəkdə öz həllini tapacaq. Diplomları həmin portaldan görmək asanlıqla mümkün olacaq. Saxta diplom alanların ondan istifadə etmə imkanları ölkədə minumumdur. Çünki bununla bağlı müvafiq araşdırmalar aparmaq asandır və şəffaf mexanizm qurulub”.
“Düşünürəm ki, mübarizə çox doğru istiqamətdə keçirilir. Bununla bağlı bizim cinayət məcəlləmizdə konkret maddə var. Kifayət qədər də sərt cəzalar nəzərdə tutulub. Bu kimi halları işə qəbul zamanı da müəyyənləşdirmək asandır”,-deyə təhsil eksperti bildirib.
İlqar Orucov həmçinin insanlara müraciət edərək bildirib ki, “ Şəxslərin bu arzunu reallaşdırması üçün Azərbaycanda imkanlar yoxdur. Yaxşı olar ki, diplom əldə etmək istəyən insan zəhmət çəkməlidir və zamanında biliyinin göstəricisi olaraq diplom əldə etsin”.
Fidan Hacızadə
13:38 24.12.2024
Oxunuş sayı: 5092
