“Dini radikalizm: milli-dini həmrəyliyə təhdid kimi” mövzusunda keçirilən konfrans başa çatıb
Masallıda “Dini radikalizm: milli-dini həmrəyliyə təhdid kimi” mövzusunda keçirilən regional konfrans işini panel sessiyalarla davam etdirib.
Crossmedia.az xəbər verir ki, konfransın “Dini zəmində xarici təsirlər və onlara qarşı mübarizə” mövzusuna həsr edilən birinci panel sessiyasına Azərbaycan İlahiyyat İnstitutunun müəllimi, fəlsəfə üzrə fəlsəfə doktoru, dosent Elvüsal Məmmədov moderatorluq edib.
Dövlət Komitəsinin Dini məsələlər üzrə şöbəsinin müdiri Cahandar Əlifzadə ölkənin dini mühitinə xarici mənfi təsirlər, dinin siyasiləşdirilməsi, eləcə də təhdidlərə qarşı mübarizənin sosial, siyasi və hüquqi əsasları barədə danışıb.
Qafqaz Müsəlmanları İdarəsinin Masallı rayonu üzrə qazısı Rəşid Talıbov nümunəvi din xadimlərinin formalaşdırılması, eyni zamanda təhsilli olmalarının önəminə diqqət çəkərək doğru dini mənbələrdən istifadənin zəruriliyini qeyd edib.
AMEA-nın akademik Ziya Bünyadov adına Şərqşünaslıq İnstitutunun Din və ictimai fikir şöbəsinin müdiri, fəlsəfə üzrə fəlsəfə doktoru, dosent Elnur Mustafayev müasir dövrdə bəşəriyyət üçün olduqca təhlükəli qlobal problemlərdən birinə çevrilən dini radikalizm və ekstremizmin qarşısının alınmasında dini icmaların fəaliyyətinin effektivliyi haqqında fikirlərini bölüşüb.
Bakı İlahiyyat Kollecinin direktoru, ilahiyyat üzrə fəlsəfə doktoru Mehman İsmayılovun moderatorluq etdiyi ikinci paneldə “Milli-mənəvi dəyərlərin təbliğində din xadimlərinin məsuliyyəti və rolu” barədə müzakirələr aparılıb.
Mənəvi Dəyərlərin Təbliği Fondunun icraçı direktorunun müavini Ceyhun Əliyev ölkəmizdə milli, dini və mənəvi dəyərlərin cəmiyyət içərisində təşviq edilməsində din xadimlərinin üzərinə düşən məsuliyyətə diqqət çəkib.
Azərbaycan İlahiyyat İnstitutunun müəllimi, İlahiyyat üzrə fəlsəfə doktoru, dosent Aslan Həbibov başqalarına qarşı dözümsüzlük nümayiş etdirilməsinin qarşısının alınmasında ən böyük rolun din xadimlərinin üzərinə düşdüyünü bildirib.
Azərbaycan İlahiyyat İnstitutunun elm və innovasiyalar üzrə prorektoru, İlahiyyat üzrə fəlsəfə doktoru, dosent Mirniyaz Mürsəlov din xadimlərinin fəaliyyətlərinə Azərbaycançılıq məfkurəsi və məzhəbüstü prinsiplər kontekstindən yanaşıb.
Çıxışlardan sonra səsləndirilən təkliflərlə bağlı fikir mübadiləsi aparılıb, suallar cavablandırılıb.
Sonda çıxış edən Dini Qurumlarla İş üzrə Dövlət Komitəsi sədrinin müavini Gündüz İsmayılov dini maarifçilik işinin təsir gücünün artırılmasında din xadimlərinin özünəməxsus rolunun olduğunu vurğulayıb. Din xadimlərinin və dini icmaların fəaliyyəti, onların qarşılaşdıqları çətinliklər barədə rəy və təkliflərin öyrənilməsi məqsədilə “Dini maarifləndirmənin aktual məsələləri: ənənə, təcrübə və perspektivlər” mövzusunda Azərbaycan Din Xadimlərinin Forumunun keçirilməsinin önəmini qeyd edib.
12:07 14.12.2024
Oxunuş sayı: 8226
