Gündəm
Milliyyəti yox, ürəyi ilə azərbaycanlı olan qəhrəman - Albert Aqarunov
Bu gün Azərbaycanın müasir tarixinə adını qızıl hərflərlə yazdıran, cəsarəti və sarsılmaz iradəsi ilə simvola çevrilən Milli Qəhrəman Albert Aqarunovun doğum günüdür.
Onun ömür yolu sadəcə bir əsgərin hekayəsi deyil, bu, Vətənə sonsuz sədaqətin, xalqlar arasındakı qardaşlığın və milli birliyin canlı dastanıdır.
1969-cu il aprelin 25-də Bakının Əmircan qəsəbəsində, yəhudi ailəsində dünyaya göz açan Albert, ailənin sonbeşiyi idi. Qarabağda müharibə alovu bürüyəndə o, gənc yaşlarından gələcəyini Vətənin müdafiəsində gördü. 1992-ci ildə tərəddüd etmədən könüllü olaraq cəbhəyə yollanan Albert, qısa müddətdə peşəkar tank komandiri kimi ad qazandı.
Albert Aqarunovun döyüş taktikası hərb tariximizdə xüsusi yer tutur. Elçin Məmmədovun rəhbərlik etdiyi 777 nömrəli xüsusi təyinatlı batalyonun tərkibində Şuşa, Xankəndi, Daşaltı və Cəmilli istiqamətlərində düşmənə qan udduran qəhrəmanımız, inanılmaz bir şücaət göstərmişdi.
Onun məharəti qarşısında aciz qalan düşmən tərəfi Albertin başına külli miqdarda pul mükafatı təyin etmişdi. Lakin o, bütün mükafatlardan uca tutduğu bir amal uğrunda vuruşurdu: Azərbaycanın bütövlüyü.
1992-ci il mayın 8-i... Şuşanın müdafiəsi uğrunda gedən sonuncu amansız döyüşlərdən biri. Albert Aqarunov snayper gülləsinə tuş gələrək qəhrəmancasına şəhid oldu. O, Bakıda, Şəhidlər xiyabanında sonsuz ehtiramla dəfn edildi.
Azərbaycan Respublikası Prezidentinin 7 iyun 1992-ci il tarixli fərmanı ilə Albert Aqarunova ölümündən sonra Azərbaycan Milli Qəhrəmanı adı verildi.
Bu gün Albertin adı təkcə Bakının küçələrində, büstlərdə və oxuduğu məktəbdə deyil, hər bir azərbaycanlının qəlbində yaşayır. O, sübut etdi ki, Vətəni sevmək üçün eyni dindən və ya eyni millətdən olmaq şərt deyil – Vətən sevgisi ruhun mənsubiyyətidir.
Ruhun şad olsun, Azərbaycanın cəsur oğlu!
Ayhan
15:00 25.04.2026
Oxunuş sayı: 1425
