Xarici xəbərlər

Bağdadda amerikalı jurnalist qaçırılıb

Bağdadda amerikalı qadın jurnalistin qaçırıldığı barədə məlumat yayılıb.

Crossmedia.az bu barədə xarici mediaya istinadən xəbər verir. Hadisə ilə bağlı ilkin məlumatlara görə, jurnalist qaldığı hotelin yaxınlığında naməlum şəraitdə yoxa çıxıb.

CNN telekanalının milli təhlükəsizlik üzrə analitiki bildirib ki, qaçırılan şəxsin onun dostu, jurnalist Şelli Kitlson olduğu ehtimal edilir və onun hazırda girov saxlanıldığı güman olunur.

İraqın Al-Sumaria telekanalı da jurnalistin itkin düşməsini təsdiqləyərək, onun hotel yaxınlığında yoxa çıxdığını qeyd edib.

ABŞ Dövlət Departamenti yaydığı bəyanatda amerikalı jurnalistin qaçırılması faktını təsdiqləyib. Bildirilib ki, hadisə ilə bağlı saxlanılan şəxsin Kətaib Hizbullah adlı, İran tərəfindən dəstəkləndiyi iddia olunan silahlı qrupla əlaqəsi var.

ABŞ dövlət katibinin qlobal məsələlər üzrə köməkçisi Dilan Conson X hesabında paylaşım edərək bildirib ki, Vaşinqton jurnalistin tezliklə azad edilməsi üçün FBI ilə sıx əməkdaşlıq edir.