İğdırda Xocalı soyqırımı qurbanlarının xatirəsi anılıb
İğdır Universiteti, Azərbaycanın Qars şəhərindəki Baş Konsulluğu, İğdır Azərbaycan Evi, İğdır - Azərbaycan Dil, Tarix və Mədəniyyət Birliyini Yaşatma və Dəstəkləmə Dərnəyinin birgə təşkilatçılığı ilə Türkiyənin İğdır şəhərində Xocalı soyqırımının 34-cü ildönümünə həsr olunan tədbir keçirilib.
Crossmedia.az xəbər verir ki, tədbirdə İğdır valisi Fırat Taşolar, Azərbaycanın Qars şəhərindəki Baş konsulu Zamin Əliyev, yerli dövlət qurumlarının rəhbərləri, ictimai təşkilatların nümayəndələri, şəhər sakinləri və gənclər iştirak ediblər.
Əvvəlcə Xocalıya həsr olunan fotosərgiyə baxış keçirilib.
Sonra Azərbaycan və Türkiyənin Dövlət himnləri səsləndirilib, şəhidlərin xatirəsi bir dəqiqəlik sükutla yad edilib.
İğdır Azərbaycan Evinin rəhbəri Ziya Zakir Acar, Azərbaycanın Qars şəhərindəki Baş konsulu Zamin Əliyev və İğdır Universitetinin prorektoru, professor Uğur Şimşek Xocalı soyqırımının insanlığa qarşı törədilən ağır cinayət olduğunu vurğulayıb, tarixi həqiqətlərin beynəlxalq ictimaiyyətə çatdırılmasının vacibliyini qeyd ediblər.
Tədbirdə Xocalı soyqırımı ilə bağlı qısametrajlı film nümayiş olunub, şeirlər səsləndirilib.
Anım mərasimi panel müzakirələri ilə davam edib.
Müzakirələrdə Qars Qafqaz Universitetinin professorları Yaşar Kop, Elnur Hasan Mikail və İğdır Universitetinin dosenti Suna Altan faciə ilə bağlı fikirlərini bölüşüblər.
21:50 04.03.2026
Oxunuş sayı: 850
