McDonald’s insan əti istifadə edir?
Sosial şəbəkələrdə yenidən alovlanan iddia dünyaca məşhur fast-food şəbəkəsi McDonald's ətrafında qorxu və şübhə dalğası yaradıb.
Paylaşımlarda şirkətin məhsullarında insan əti istifadə olunduğu iddia edilir. Videolarda guya ABŞ-nin Oklahoma City şəhərində yerləşən istehsal məntəqəsində insan və at ətinin aşkarlandığı, həmin ətlərin restoranlara göndərildiyi deyilir.
Kadrlarda soyuducu anbarlar, ət parçaları və naməlum məkan görüntüləri montaj edilərək vahiməli fon musiqisi ilə təqdim olunur.
Səs yazısında isə “FBI agentinin etirafı” kimi təqdim edilən iddialar səsləndirilir. Lakin araşdırma göstərir ki, görüntülər müxtəlif mənbələrdən toplanaraq birləşdirilib və faktiki sübut təqdim olunmur.
İddianın başlanğıcı: satirik sayt
Məsələnin izi 2014-cü ilə gedib çıxır. Həmin vaxt uydurma və satirik xəbərlər yayan Huzlers adlı internet saytı “McDonalds Exposed For Using Human Meat” başlıqlı məqalə dərc edib. Materialda Oklahoma City-dəki müəssisədə insan ətinin tapıldığı iddia olunurdu.
Lakin saytın “About us” bölməsində yayımlanan məzmunların satirik olduğu açıq şəkildə qeyd edilmişdi. Buna baxmayaraq, məqalə sosial şəbəkələrdə kontekstdən çıxarılaraq gerçək xəbər kimi paylaşılmağa başladı və illər ərzində şəhər əfsanəsinə çevrildi.
Beynəlxalq araşdırmalar nə deyir?
Mövzu beynəlxalq media qurumlarının da diqqətini çəkib. Associated Press və Reuters tərəfindən aparılan fakt-yoxlamalarda iddianın saxta və əsassız olduğu bildirilib. Araşdırmalarda qeyd olunub ki, insan əti ilə bağlı irəli sürülən məlumatların heç biri rəsmi sənəd və ya hüquqi faktla təsdiqlənməyib.
Şirkətin rəsmi mövqeyi
McDonald's məsələ ilə bağlı dəfələrlə açıqlama yayıb. Şirkət bildirib ki, məhsullarında yalnız 100 faiz mal və toyuq əti istifadə olunur.
McDonald's Türkiye isə açıqlamasında Türkiyədə istifadə olunan qırmızı ətin Namet, toyuq məhsullarının isə Banvit tərəfindən təchiz edildiyini vurğulayıb. Eyni zamanda məhsulların mütəmadi olaraq qida təhlükəsizliyi standartlarına uyğun yoxlanıldığı bildirilib.
Niyə belə iddialar yayılır?
Belə ki, böyük və qlobal brendlər tez-tez konspirasiya nəzəriyyələrinin hədəfinə çevrilir. Xüsusilə fast-food sektoruna qarşı olan tənqidi münasibət belə xəbərlərin sürətlə yayılmasına zəmin yaradır. Sosial şəbəkələrdə sensasion və qorxu yaradan başlıqlar daha çox klik topladığı üçün köhnə və təkzib olunmuş iddialar vaxtaşırı yenidən gündəmə gətirilir.
McDonald’s insan əti istifadə edir” iddiası faktlarla təsdiqlənməyən, satirik mənbədən qaynaqlanan və illərdir dövriyyəyə buraxılan şəhər əfsanəsidir. Rəsmi qurumların və beynəlxalq media təşkilatlarının araşdırmaları bu məlumatın doğru olmadığını göstərir.
Fatimə Məmmədova
01:43 27.02.2026
Oxunuş sayı: 444
