Sosium

Davamlı siyasət və beynəlxalq etimad: BƏƏ-nin sülh nümunəsi

4 fevral 2026-cı ildə Əbu-Dabidə “Zayed İnsan Qardaşlığı Mükafatı”nın təqdimolunma mərasimi keçirildi. Tədbirdə çıxış edən cənab Prezident İlham Əliyev Şeyx Zayedin adını daşıyan bu nüfuzlu mükafata layiq görülməyi böyük şərəf kimi dəyərləndirib. Dövlət başçısı bildirib ki, bu mükafat yalnız fərdi bir qiymətləndirmə deyil, eyni zamanda Azərbaycan ilə Birləşmiş Ərəb Əmirlikləri arasında uzun illərə söykənən dostluq və əməkdaşlıq münasibətlərinin göstəricisidir. Ölkə başçımız qeyd edib ki, iki ölkəni birləşdirən əlaqələr ortaq tarixi dəyərlərə, mədəni yaxınlığa və qarşılıqlı hörmətə əsaslanır. Onun sözlərinə görə, Şeyx Zayedin irsi xalqlar arasında insan qardaşlığının, sülhün və humanitar əməkdaşlığın təşviqinə mühüm töhfə verib və bu dəyərlər bu gün də Azərbaycan–BƏƏ münasibətlərinin əsasını təşkil edir. Dövlət başçısı vurğulayıb ki, bu münasibətlərin gələcəkdə də qarşılıqlı etimad və tərəfdaşlıq ruhunda inkişaf edəcəyinə əminlik var. Əhəmiyyətli tarix olan “Birlik Andı Günü”, ölkəsinə, xalqına sədaqəti yenidən təsdiqləmək və ölkənin davamlı inkişafını qeyd edilməsi istiqamətində Prezident Şeyx Məhəmməd Bin Zayed Əl Nəhyan tərəfindən milli bir hadisə olaraq dəyərləndirilir. Bu günün məqsədi milli kimliyi gücləndirmək, həmçinin mürəkkəb regional bir şəraitdə formalaşmış BƏƏ-nin dövlət quruculuğunu və birliyini ifadə etməkdir.Mərhum qurucu lider Şeyx Zayed bin Sultan Al Nahyan ərəb dünyasında ilk federal dövlət olan Birləşmiş Ərəb Əmirliklərinin qurucusu kimi ölkədə genişmiqyaslı inkişaf və modernləşmə prosesinə başlamışdır. Rəhbərliyi dövründə bölgədə misilsiz inkişaf təşəbbüslərinin əsasını qoymuşdur. Şeyx Zayed bin Sultan Al Nahyanın müəyyən etdiyi inkişaf strategiyası bu gün də Birləşmiş Ərəb Əmirliklərinin dövlət siyasətinin əsasını təşkil edir. Onun möhkəm təməl üzərində formalaşan xətti nəticəsində BƏƏ iqtisadiyyat, humanitar sahə, infrastruktur, bərpa olunan enerji və kosmos tədqiqatları istiqamətlərində mühüm nailiyyətlər əldə edib. 2022-ci ildən etibarən Prezident Şeyx Məhəmməd bin Zayed Əl Nəhyanın rəhbərliyi altında ölkə bu dinamikanı davam etdirərək regional və qlobal rəqabətlilik göstəricilərində yüksək mövqelərini qoruyub saxlayır. Qeyd edək ki, “Zayed İnsan Qardaşlığı Mükafatı” Birləşmiş Ərəb Əmirliklərinin qurucusu mərhum Şeyx Zayed bin Sultan Al Nahyanın şərəfinə adlandırılıb. Dünyada sülh, həmrəylik və dinc yanaşı yaşama prinsiplərini təşviq edən şəxslərə və qurumlara verilən nüfuzlu beynəlxalq mükafatdır. Bu mükafatlar yalnız müstəsna xidmətləri olan şəxsiyyətlərə verilir.2026-cı ildə cənab Prezident İlham Əliyevin bu mükafata təltif olunması dövlətimizin qlobal miqyasda sülh quruculuğu prosesindəki artan roluna beynəlxalq səviyyədə verilən yüksək qiymətin, eyni zamanda Azərbaycan ilə BƏƏ arasında dostluq və etimada əsaslanan münasibətlərin möhkəmliyinin göstəricisir. Bu təltif iki ölkə arasında əməkdaşlığın və qarşılıqlı anlaşmanın təzahürüdür.

“Birləşmiş Ərəb Əmirliklərinin banisi, mərhum Şeyx Zayedin adını daşıyan bu mükafata layiq görülmək mənim üçün böyük şərəfdir”. Bu sözləri Azərbaycan Prezidenti cənab İlham Əliyev Əbu-Dabi şəhərində “Zayed İnsan Qardaşlığı Mükafatı”nın təqdimolunma mərasimindəki çıxışı zamanı deyib.Sülh nümunəsinin beynəlxalq əhəmiyyətinə toxunan cənab Prezident İlham Əliyev çıxışında qeyd edib ki, Azərbaycan və Ermənistanın sülhə doğru atdığı addımlar başqa bölgələrdə sülh və əməkdaşlıq qurmaq istəyən dövlətlər üçün də nümunə ola bilər. Bu yanaşma mükafatın yalnız simvolik deyil, eyni zamanda real diplomatik və humanitar təsirə malik olduğunu göstərir.Şeyx Məhəmməd atasının inkişaf, tərəqqi və davamlı müasirləşmə siyasətini uğurla davam etdirir. Bu gün öz qədim köklərinə bağlı olan Birləşmiş Ərəb Əmirlikləri, sülh və birlik şəraitində yaşayan bir cəmiyyətin necə qurulması baxımından bir çox ölkələr üçün nümunədir. Azərbaycan Prezidenti cənab İlham Əliyev həmçinin qeyd etmişdir ki, Şeyx Zayedin ideyaları bu gün də aktuallığını qoruyur və Azərbaycan-BƏƏ əməkdaşlığında etimad və dostluq münasibətlərinin möhkəmlənməsinə xidmət edir. Şeyx Zayed bin Sultan Al Nahyanın siyasəti insan və cəmiyyət mərkəzli yanaşma üzərində qurulub. Onun əsas prinsipləri daxili inkişafın sosial rifahla uzlaşdırılması, milli dəyərlərin qorunması, tolerantlığın təşviqi və humanitar təşəbbüslərə xüsusi önəm verilməsi olub. Xarici siyasətdə isə qarşılıqlı hörmət, dövlətlərin suverenliyinə ehtiram, regionda sülhün möhkəmləndirilməsi prioritet təşkil edib. Uzaqgörən və insanyönümlü prinsiplər bu gün də Birləşmiş Ərəb Əmirliklərinin dövlət siyasətinin, eləcə də Azərbaycanla münasibətlərinin əsasını təşkil edir