Ukraynanın uzun- incə yolu: Avropaya açılan qapı
Ukraynanın Avropa İttifaqına (Aİ) üzvlük istiqamətində atdığı addımlar ölkənin xarici siyasət strategiyasının əsas xəttini təşkil edir və bu proses rəsmi Kiyevin gündəliyində mərkəzi yer tutur. Avropa ailəsinə inteqrasiyanı strateji məqsəd kimi müəyyən edən Ukrayna, institusional islahatların sürətləndirilməsi, hüquqi və iqtisadi standartların Aİ tələblərinə uyğunlaşdırılması, eləcə də təhlükəsizlik və sabitlik məsələlərində Avropa strukturları ilə daha sıx əməkdaşlığın qurulmasına xüsusi önəm verir. Bu kontekstdə genişlənmə danışıqlarının praktiki mərhələsinə keçid hesab olunan danışıqlar klasterlərinin açılması Ukrayna üçün mühüm siyasi və diplomatik prioritet kimi dəyərləndirilir.
Aİ Şurasına sədrlik edəcək Kiprin bu prosesdəki rolu isə xüsusi diqqət mərkəzindədir. Ukrayna Kiprin sədrliyi dövründə Aİ-nin genişlənmə gündəliyində irəliləyişin təmin olunacağına ümid edir və bu istiqamətdə siyasi dəstəyin vacibliyini vurğulayır. Aparılan müzakirələr yalnız üzvlük prosesi ilə məhdudlaşmır. Rusiyaya qarşı beynəlxalq təzyiqlərin gücləndirilməsi, Ukrayna üçün etibarlı təhlükəsizlik zəmanətlərinin formalaşdırılması, habelə Avropanın ümumi təhlükəsizlik arxitekturasında tərəfdaş ölkələrin rolunun artırılması kimi məsələləri də əhatə edir. Bu çərçivədə Ukrayna və Kipr arasında ikitərəfli əməkdaşlığın genişləndirilməsi və qarşılıqlı siyasi dialoqun dərinləşdirilməsi Avropanın təhlükəsizliyinə töhfə verən mühüm amillərdən biri kimi qiymətləndirilir.
Məsələ ilə bağlı politoloq Əhəd Məmmədli Crossmedia.az-a açıqlama verib: "Aİ-nin Ukraynanın üzvlüyünə yanaşması məsələsi mürəkkəbdir. Rusiya bunun əleyhinə deyil, amma Ukraynanın hazırda üzv olub-olmayacağı hələ müzakirə mərhələsindədir. Danışıqlar artıq başlayıb, lakin bu, hələ üzvlük anlamına gəlmir. Məsələn, Türkiyə ilə danışıqlar da Aİ qurulandan bəri davam edir, amma hələ nəticə yoxdur. Bəzi postsovet ölkələrində, o cümlədən Azərbaycanda da yanlış təsəvvür var ki, Aİ-yə üzv olan kimi ölkə avtomatik olaraq “yağ bal içində yaşayacaq”. Amma reallıq belə deyil. Şərqi Avropa ölkələrinə, məsələn Rumıniya və Bolqarıya baxsaq, görərik ki, təşkilata üzv olduqdan sonra da problemlər qalır, narazılıqlar, etirazlar və rifah səviyyəsi gözləniləndən aşağıdır. Aİ-yə üzvlük Almaniya və ya digər inkişaf etmiş ölkələrdəki həyat səviyyəsini avtomatik təmin etmir". 
Politoloq, həmçinin Ukraynanın hazırda ərazilərini itirmək kimi böyük təhlükələrlə üzləşdiyini bildirib: "Əgər ölkə üzv olsa belə, itirilən torpaqlar və davam edən münaqişələr fonunda bu üzvlük “yağ bal içində yaşamaq” mənasını verməyəcək. Bəzi insanlar üçün vətən anlayışı sadəcə yaxşı yaşamaqdır, amma fikrimcə, bir dövlət üçün prioritet ərazi bütövlüyüdür. Hazırda Aİ ilə aparılan danışıqlar həm də Ukrayna hakimiyyətinə dəstək mesajıdır. Bu, həm də Ukrayna Prezidenti Volodimir Zelenski iqtidarına ittifaqla danışıqların getdiyini və Kiyevin beynəlxalq səviyyədə dəstəkləndiyini xalqa göstərməyə imkan verir. Bununla belə, Ukraynanın yaxın zamanda ittifaqa üzv olacağını real görmürəm. Çünki növbədə olan digər ölkələr var və Ukrayna onlardan sonra gəlir. Nəticə olaraq, Ukrayna gələcəkdə üzv ola bilər, amma bu proses zaman alacaq. Üstəlik, Aİ özü də gələcəkdə necə fəaliyyət göstərəcək, qalacaqmı, dəyişəcəkmi – bu da ayrıca sualdır".
Elmir Heydərli
14:38 08.01.2026
Oxunuş sayı: 1656
