Daxili borclanmanın iqtisadiyyata təsiri - Ekspert açıqladı
Dövlət maliyyə siyasətini həyata keçirəndə borclanma mühüm amillərdən birinə çevrilir. Azərbaycanın daxili maliyyə bazarında, xüsusən dövlət istiqrazlarının satılması yolu ilə həyata keçirilən borclanma, ölkənin maliyyə sabitliyini təmin etmək və büdcə xərclərinin idarə olunmasını asanlaşdırmaq baxımından xüsusi əhəmiyyət kəsb edir.
Dövlət istiqrazlarının buraxılması, yalnız dövlətin maliyyə ehtiyaclarını qarşılamaqla kifayətlənmir, həm də maliyyə bazarının genişlənməsinə və investor marağının artmasına səbəb olur. Bu yanaşma, büdcə kəsirlərinin vaxtında aradan qaldırılmasına və dövlətin maliyyə və iqtisadiyyatın sabitliyinin qorunmasına imkan verir.
Mövzu ilə bağlı Crossmedia.az-a açıqlama verən iqtisadçı ekspert Ruslan Atakişiyev daxili borclanmanın və dövlət istiqrazlarının ölkə iqtisadiyyatı və maliyyə bazarı üzərindəki təsirlərindən danışıb:
"Azərbaycanda dövlət istiqrazlarının satılması yolu ilə daxili bazarda borclanma həyata keçirilir. Daxili borclanmanın xarici borclanmaya nisbətən riski daha aşağıdır. Dövlətin prioritet istiqamətlərindən biri də ondan ibarətdir ki, daxili borclanmadan istifadə edilsin. Ümumiyyətlə bundan beynəlxalq təcrübədə çox istifadə olunur. İnkişaf etmiş ölkələrdə də dövlət istiqrazları buraxılır və onun vasitəsi ilə borclanma həyata keçirilir. Borclanma dövlət büdcəsinin stabil xərclərinin idarə olunması baxımından əhəmiyyət kəsb edir. Çünki dövlət büdcəsinin formalaşmasında yığımlar bəzi hallarda xərclərin həyata keçirilməsi ilə üst-üstə düşmür. Burada gecikmələr, çatışmazlıqlar olur. Bu daxili borclanma həmin kəsrlərin vaxtında aradan qaldırılmasına imkan yaradır".
Ekspert sonda dövlət istiqrazlarının satılmasının, dövlətin Qafqaz bazarında geniş şəkildə iştirak etməsinin ümumilikdə maliyyə bazarının inkişafına müsbət təsir göstərdiyini vurğulayıb.
Banuçiçək Kalbalıyeva
05:01 29.11.2024
Oxunuş sayı: 9799
