Vidnoyedəki "işgəncə" reabilitasiya mərkəzinin sahibi həbs olundu
Moskva vilayətindəki məhkəmə Vidnoyedə yerləşən və “işgəncə reabilitasiya mərkəzi” kimi tanınan müəssisənin təşkilatçısı Maksim Antonov barəsində həbs qətimkan tədbiri seçib. O, adam oğurluğu və qanunsuz həbsdə ittiham olunur və 3 fevrala qədər həbsdə saxlanılacaq.
Bu barədə Crossmedia.az RIA Novosti-yə istinadən xəbər verir.
İstintaq materiallarına görə, mərkəzdə sakinlərə qarşı sistemli işgəncələr tətbiq olunub. Onlar ac saxlanılıb, döyülüb və qeyri-qanuni şəkildə həbsdə saxlanıblar. Mərkəzdə qida çatışmazlığından bir şəxsin üç ayda 60 kiloqram arıqladığı müəyyən edilib. Zərərçəkən bildirib ki, böyrəklərinə zərbələr endirilib, üzərinə soyuq su tökülüb və demək olar ki, heç bir yemək verilməyib.
İddialara görə, 40 nəfərlik qrupun qidalanması üçün gündə cəmi bir toyuq ayrılıb.
Qeyd edək ki, bir müddət əvvəl Moskva bölgəsində uşaqların zorakılığa məruz qaldığı başqa bir reabilitasiya mərkəzinin təsisçisi də həbs olunmuşdu.
21:52 05.12.2025
Oxunuş sayı: 1214
