Eçmiədzin saxta hesablarla insanlara hücumlar təşkil edir — arxiyepiskop Saroyan
Eçmiədzinin geniş “feyk ordusu”ndan istifadə edərək müxtəlif şəxslərə qarşı təşkil olunmuş hücum kampaniyaları apardığı bildirilir. Bu barədə Masyatsotn yeparxiyasının rəhbəri, arxiyepiskop Gevorq Saroyan Ermənistan mediasına açıqlama verib.
Crossmedia.az xarici mediaya istinadən xəbər verir ki, arxiyepiskopun sözlərinə görə, “Müqəddəs Mübarizə” revanşist hərəkatının lideri Baqratın çıxışı zamanı 24 yepiskopdan 20-si bu cür siyasi aksiyaların başlanmasına qarşı olsa da, qərar dəyişməyib. Saroyan qeyd edir ki, o, II Qaregini dəfələrlə kilsəni siyasətə cəlb etməmək barədə xəbərdar edib.
O bildirib ki, Baqratın “xidmətinin dondurulması” formal xarakter daşıyır, çünki din xadimi rəsmi libasda mitinqlər təşkil edərkən ictimaiyyət bunun arxasında şəxsin deyil, kilsənin dayandığını düşünür. Arxiyepiskopun sözlərinə görə, bir çox insanlar məhz din xadiminin geyiminə hörmət edərək bu hərəkatın kilsə tərəfindən dəstəkləndiyini zənn ediblər.
Saroyan əlavə edib ki, özü də bir dəfə Samvel Karapetyanın dəstəklənməsi üçün keçirilən mitinqdə çıxış etməyə məcbur edilib:
“Onu tanımasam da, mənə tribunaya çıxıb çıxış etməli olduğumu dedilər. Başa düşdüm ki, bu, yolverilməzdir və insanların gözündə din xadiminə olan münasibəti dəyişir”.
Onun sözlərinə görə, ikinci dəfə siyasi aksiyada iştirakı qəti şəkildə rədd edib, çünki bunun “özünü məhvə aparan yol” olduğunu anlayıb:
“Kilsə heç bir tərəfin tərəfində dura bilməz. Biz hamıya xidmət etməliyik”.
Arxiyepiskop bildirib ki, II Qaregini bir neçə dəfə şəxsən siyasətdən uzaq durmağa çağırıb:
“Bu addımlar kilsəni dağıdır. Siyasətə qarışmaq kilsənin missiyası deyil”, - deyə o vurğulayıb.
Türkan Kərimli
11:41 03.12.2025
Oxunuş sayı: 550
