Alimdən önəmli iddia: Böyük sərkərdə Nurəddin Zəngi Zəngəzur mənşəlidir
Azərbaycanlı tədqiqatçı-alim, Misirin ən ali birinci dərəcəli “Elm və fənlər” ordeni ilə təltif olunmuş Dr. Seymur Nəsirov böyük sərkərdə Nurəddin Zənginin mənşəyi ilə bağlı apardığı tədqiqatlardan danışıb. O, öz yutub platformasındakı açıqlamasında bildirib ki, məşhur ərəbşünas və tarixçi İbn Əsirin "Əl-Kamil fit-Tarix" əsərində Nurəddin Zənginin Azərbaycanla bağlılığına dair mühüm məlumatlar yer alır.
Seymur Nəsirovun sözlərinə görə, İbn Əsir Əyyubilərin Nurəddin Zəngi ilə birləşməsinin səbəbini onların Azərbaycanın qədim Dvin şəhərindən olması ilə əlaqələndirir. Alim qeyd edib ki, qədim Dvin şəhəri Zəngəzur mahalında yerləşib və ərəb dilində Zəngəzurlu sözünü ifadə etmək üçün "Zəngi" forması işlədilir. Bu da ərəb dilinin qrammatik qaydalarına tam uyğundur.
O, əlavə edib ki, ərəb dilində mürəkkəb sözlərə mənsubiyyət şəkilçisi əlavə edilərkən sözün ilk hissəsi dəyişir. Məsələn, Suriyanın Diruzor şəhərindən olanlara ərəb dilində Əddiri deyilir. Yəmənin Hadramut bölgəsindən olanlara Hadari deyilir. Türkiyənin Antep şəhəri ərəb dilində Ayni kimi işlənir.
S.Nəsirov həmçinin qeyd edib ki, ərəb dilində "g" hərfinin "k" ilə əvəz olunması da məlum dil hadisəsidir. Gəncəvi sözünün ərəb dilində Kənci və Kəncəvi formasında işlədilməsi buna misaldır. Onun fikrincə, məhz bu səbəbdən "Zəngi" sözü ərəb mənbələrində "Zənki" kimi görünür.
Alimin qənaətinə görə, bütün bu dil nümunələri və tarixi mənbələr Nurəddin Zənginin Zəngəzur mənşəli olmasına ciddi elmi əsas yaradır.
Nigar Yahyazadə
19:10 01.12.2025
Oxunuş sayı: 1577
