Gürcüstan sərhədində gərginlik: Azərbaycan TIR-ları həftələrlə saxlanılır
Gürcüstan–Azərbaycan sərhədində yük maşınlarının keçidi ilə bağlı yaranmış vəziyyət son günlər daha da gərginləşib. Azərbaycanlı sürücülər həftələrlə növbədə gözlədiklərini, bəzilərinin isə sentyabrdan bu yana sərhədi keçə bilmədiyini bildirir. Məlumatlara görə, gecikmələr əsasən Azərbaycan nömrəli TIR-lara tətbiq olunur, digər ölkələrdən gələn maşınlar isə daha sürətli buraxılır.
Müşahidələr göstərir ki, burada artıq texniki yox, münasibətə bağlı bir seçicilik formalaşır. Bu, sərhəd idarəçiliyində qeyri-bərabər yanaşma təəssüratı yaradır.
Sürücülər deyirlər ki, saxlanılmaların səbəbi izah edilmir, tərcüməçi verilmir və onlar aydın izahat ala bilmirlər. Çox vaxt yalnız qısa və sərt şəkildə "gözləyin" cavabı ilə qarşılaşırlar. Eyni zamanda bəzi hallarda ödənişlərin "düzgün banklar" vasitəsilə həyata keçirilməsinə eyham vurulduğu iddia olunur ki, bu da korrupsiya şübhələrini artırır.
Belə eyhamlar prosesin şəffaf olmadığını və bəzi strukturların özbaşına qaydalar tətbiq etdiyini göstərən siqnal kimi dəyərləndirilir.
Əslində isə bu problem ilk dəfə müşahidə olunmur. Son illərdə Gürcüstanın ayrı-ayrı qurumlarında Azərbaycana qarşı neytral olmayan, bəzən isə qərəzli davranış nümunələri qeyd olunub. Bu isə hazırkı vəziyyətin xaotik yox, sistemli xarakter daşıdığı ehtimalını gücləndirir.
Oxşar hadisələrin təkrarlanması iki ölkə arasında strateji münasibətlər fonunda uyğunsuzluq yaradır və Gürcüstanın bəzi strukturlarında münasibətin dəyişdiyi hiss olunur.
Bəzi rəsmilər tərəfindən səsləndirilən "bəyənmirsinizsə, alternativ marşrut tapın" tipli yanaşmalar isə əməkdaşlıq ruhuna uyğun hesab edilmir.
Azərbaycan uzun illərdir Gürcüstanın əsas tərəfdaşlarından və ən böyük investorlarından biri olub. Enerji, tranzit və maliyyə sahələrində Bakı Tbilisini ardıcıl şəkildə dəstəkləyib. Çətin illərdə qış aylarında qaz tədarükü də Azərbaycan tərəfindən təmin olunub. 2008-ci ildə Gürcüstan müharibə vəziyyətində qalanda da Azərbaycan onun yanında olub.
Bu tarixi fon hazırkı sərt və anlaşılmayan davranışlarla bir araya sığmır. Çoxillik strateji tərəfdaşlığın belə epizodlarla zədələnməsi regiondakı ümumi dinamikanı da dəyişə bilər.
Bildirilir ki, vəziyyət davamlı olaraq gərginləşərsə, Azərbaycan tərəfi cavab xarakterli addımlar atmağa məcbur qala bilər.
Yeni tranzit infrastrukturunun xüsusilə Zəngəzur dəhlizinin formalaşdığı bir mərhələdə Gürcüstanın öz mövcud logistik üstünlüyünü riskə atması diqqət çəkir.
Hazırkı vəziyyət göstərir ki, problem şəffaf və sistemli qərarlarla qısa müddətdə həll oluna bilər. Lakin təşəbbüs Gürcüstan tərəfindədir və gələcək proseslərin hansı istiqamətdə inkişaf edəcəyi onların addımlarından asılı olacaq.
Nigar Yahyazadə
10:55 30.11.2025
Oxunuş sayı: 1679
