Sosium

Hər izi şəfa olan ocaq-Kəlbəcər

Prezident İlham Əliyevin 2023-cü il iyulun 31-də imzaladığı Sərəncama əsasən 25 noyabr Kəlbəcər Şəhəri Günü kimi qeyd olunur.

Ulu Öndər Heydər Əliyevin: “Kəlbəcər Azərbaycanın ayrılmaz bir parçasıdır, hissəsidir. Heç şübhəsiz, o gün gələcək ki, Kəlbəcər rayonu Ermənistan silahlı qüvvələrinin işğalından azad olacaq və Kəlbəcərin vətəndaşları, sakinləri, bizim soydaşlarımız öz yerlərinə, yurdlarına qayıdacaqlar” deməsi Ali Baş Komandan cənab İlham Əliyevin rəhbərliyi ilə 27 illik həsrətdən sonra Kəlbəcəri öz tarixi torpaqlarına qovuşdurdu. Uzun sürən həsrətdən sonra öz dədə-baba yurdlarından uzaq düşmüş insanlar artıq doğma məkanlarında öz həyatlarına davam edirlər. Kəlbəcər rayonu 1993-cü il aprelin 2-də ermənilərin vəhşi hucumuna məruz qalıb. İşğal nəticəsində 511 dinc sakin şəhid edilib, 321 nəfər əsir götürülüb və itkin düşüb. İşğalçılar onlarla tarixi-mədəniyyət abidəsini, məktəb, uşaq bağçalarını, kitabxana, mədəniyyət evləri, xəstəxanaları talan edib, rayona milyardlarla ziyan vurublar. Azərbaycan Respublikasının Nazirlər Kabinetinin 1 may 2024-cü il tarixli, 235 nömrəli Qərarına əsasən, ”Kəlbəcər şəhərinin 2040-cı ilədək inkişafına dair Baş Planı” təsdiq edilib. Bu plana əsasən Kəlbəcər şəhərinin tarix-memarlıq ənənələri nəzərə alınmaqla tərtib edilib. Rayon əhalisinin 4250 mənzillə (adambaşına 25 m²) təmin olunması, həmçinin 4 məktəb (960 şagird yerlik), 4 uşaq bağçası (520 yerlik), 2 xəstəxana (160 çarpayılıq), 1 reabilitasiya mərkəzi (150 çarpayılıq), İşğal və Zəfər muzeyləri, mehmanxanalar, müxtəlif ictimai-iaşə obyektləri və idman meydançalarının tikintisi planlaşdırılır.

Kəlbəcər rayonu ərazisi ən qədim insan məskənlərindən biri kimi tanınır. Dağlar qoynunda yerləşən Kəlbəcər başdan-başa canlı zəngin təbiətə malikdir. Rayon ərazisində otuz mindən artıq bulaq var ki, bunlardan da həzm sistemi xəstəliklərinin əvəzsiz müalicəsi hesab olunan zəngin mineral tərkibə malik olan İstisu müalicə ocağında yerləşir. İstisu mineral suları hipertermal, karbon qazlı, hidrokarbonatlı-xloridli-sulfatlı-natriumludur və daim çağlayan 12 bulaqdan ibarətdir. Kəlbəcərin gözəl təbiəti, əlverişli relyefi dövlət iqtisadiyyatı və turizm sahəsinin inkişafı üçün böyük əhəmiyyət daşıyır. Həmçinin relyefi dağlıq olan Kəlbəcər rayonu təbii ehtiyatlarının zənginliyi baxımından xüsusi olaraq fərqlənir.

Bu gün Kəlbəcər bütün ölkə üzrə həyata keçirilən genişmiqyaslı quruculuq və bərpa prosesinin aparıcı mərkəzlərindən birinə çevrilməkdədir. Yeni yollar, enerji infrastrukturunun yaradılması, “ağıllı şəhər” konsepsiyasına əsaslanan layihələr Kəlbəcərin gələcəyinin necə böyük inkişaf potensialına malik olduğunu göstərir.

Prezident İlham Əliyev və Birinci vitse-prezident Mehriban Əliyeva dəfələrlə Kəlbəcərdə səfərdə olması rayonda aparılan nəhəng quruculuq işləri ilə bu diyarın daha da gözəl gələcəyindən, azad olunmuş ərazilərə “Böyük Qayıdış”ın uğurlu perspektivindən xəbər verir. Vətən müharibəsində Azərbaycanın qazandığı böyük Zəfər ərazi bütövlüyümüzün bərpa olunması, işğaldan azad edilmiş torpaqlarımızın iqtisadiyyata dayanıqlı inkişafının təminatı üçün daha geniş üfüqlər açır. Kəlbəcərin qaytarılması Azərbaycanın döyüş meydanında olduğu kimi diplomatik danışıqlarda da qalib olmasının göstəricisidir. Bu hadisə möhtəşəm tarixi Qələbənin bir daha təsdiqidir.

Azad edilmiş torpaqların bərpasının, Azərbaycanın güclü və müasir dövlət kimi inkişafının simvoludur. 25 noyabr Kəlbəcər günü hamçinin vətənpərvərlik ruhunun gücləndirilməsi və gələcək nəsillərə Azərbaycan tarixinin öyrədilməsi baxımından böyük əhəmiyyət kəsb edir. Bu gün Kəlbəcər yenidən doğulur, əzəmətli keçmişinə dayanaraq parlaq gələcəyə doğru inamla addımlayır. Bu Azərbaycanın döyüş meydanında olduğu kimi diplomatik danışıqlarda da qalib olmasının göstəricisidir. Kəlbəcər şəhəri günü kimi təsis edilməsi Azərbaycan dövlətinin şanlı zəfərinə verilən yüksək dəyərin təcəssümüdür. Bu gün yalnız azad olunmuş Kəlbəcər günü deyil, həm də bütöv Azərbaycan gücünün, əzminin və qətiyyətinin rəmzi günüdür.