Tullantı sularının idarə olunması sistemlərinin bərpası üçün vəsait ayrılması təklif olunub
Dövlət büdcəsindən qrunt və tullantı sularının idarə olunması sistemlərinin bərpası və ekoloji layihələrin icrası üçün maliyyə vəsaitinin ayrılması təklif edilib.
Crossmedia.az xəbər verir ki, belə təkliflə Milli Məclisin bu gün keçirilən plenar iclasında “Azərbaycan Respublikasının 2026-cı il dövlət büdcəsi haqqında” qanun layihəsinin müzakirəsi zamanı deputat Soltan Məmmədov çıxış edib.
Deputat qeyd edib ki, məqsədli büdcə fondlarına hər il dövlət büdcəsindən kifayət qədər vəsait ayrılır: “Bu baxımdan təmsil etdiyim Xəzər rayonunda içməli su təchizatının yaxşılaşdırılması, qrunt və tullantı sularının idarə olunması ilə bağlı məsələlərə diqqət göstərilməsinə ehtiyac var. Bu, həm iqtisadi, həm ekoloji, həm də sosial baxımdan olduqca mühüm əhəmiyyətə malik məsələlərdən biridir. Xəzər rayonunun Buzovna, Şağan və Mərdəkan qəsəbələrində yeraltı suların idarə olunması sistemlərinin təkmilləşdirilməsinə ehtiyac var. Xəzər rayonunun turizm potensialını, son illərdə rayon ərazisində salınmış yeni yaşayış massivlərini nəzərə alaraq 2026-cı il dövlət büdcəsində məqsədli büdcə fondlarından içməli su təchizatının yaxşılaşdırılması, qrunt və tullantı sularının idarə olunması sistemlərinin bərpası və ekoloji layihələrin icrası üçün maliyyə vəsaitinin ayrılması ilə bağlı hökumətə müraciət edirəm”.
Soltan Məmmədov bildirib ki, həm 2026-cı ilin dövlət büdcəsində, həm də icmal büdcədə səhiyyəyə ayrılan vəsaitin artması ölkədə uğurla həyata keçirilən icbari tibbi sığortanın müsbət nəticələrindən biri kimi qiymətləndirilə bilər: “2026-cı il üçün səhiyyə xərcləri 2025-ci illə müqayisədə 30,7 milyon manat və ya 1,5 faiz, 2024-cü ilin icrası ilə müqayisədə isə 195,5 milyon manat və ya 10,7 faiz çoxdur. Dövlət büdcəsinin xərcləri strukturunda səhiyyə xərclərinin xüsusi çəkisinin 4,9 faizə çatması da müsbət haldır. Azərbaycan tarixində ilk dəfə səhiyyə xərcləri üçün bu qədər vəsaitin ayrılması, icbari tibbi sığorta zərfinin genişləndirilməsi tendensiyası tibbi xidmətlərin keyfiyyətinin və əlçatanlığının artırılmasına xidmət edir. Hesab edirəm ki, bu strategiya xüsusilə həssas qrupdan olan insanların səhiyyə xidmətlərindən istifadə etməsinə daha geniş imkan yaradacaq”.
Deputat qeyd edib ki, gələn ilin dövlət büdcəsinin xərclərinin 41 faizinin sosial yönümlü xərclərə yönəldilməsi də büdcənin sosial yönümlü olduğunu göstərir: “Dövlət Sosial Müdafiə Fondunun həm xərclərinin, həm də gəlirlərinin artımı, İşsizlikdən Sığorta Fondu çərçivəsində həyata keçirilən aktiv məşğulluq tədbirlərinin genişləndirilməsi, İşsizliyə görə sığorta ödənişlərinin həcminin 60 faiz-lik artımı da sosialyönümlü büdcə yanaşmasının təzahürüdür”.(APA)
20:21 19.11.2025
Oxunuş sayı: 1163
