Akademik Mahmud Kərimovun biblioqrafik göstəricisi nəşr olunub
Radiasiya fizikası sahəsinin tanınmış alimi, AMEA-nın sabiq prezidenti, fizika-riyaziyyat elmləri doktoru, professor, “Şöhrət” ordenli akademik Mahmud Kərimovun anadan olmasının 75 illiyi münasibətilə alimə həsr olunmuş biblioqrafik göstərici işıq üzü görüb.
Nəşr AMEA Rəyasət Heyətinin qərarına uyğun olaraq, Azərbaycan Milli Elmlər Akademiyasının 80 illik yubileyi çərçivəsində Mərkəzi Elmi Kitabxananın tərtibatında “AMEA rəhbər heyətinin biblioqrafiyaları” seriyası üzrə hazırlanıb.
Akademik Mahmud Kərimov radiasiya fizikası ilə yanaşı elmi-təşkilati fəaliyyət sahəsində də mühüm xidmətlər göstərib. Onun rəhbərliyi dövründə Azərbaycan elminin beynəlxalq inteqrasiyası sürətlənib, xarici elm mərkəzləri ilə əməkdaşlıq genişlənib. 2001–2013-cü illərdə AMEA-ya rəhbərliyi müddətində Naxçıvan və Gəncə bölmələri, Lənkəran Regional Elmi Mərkəzi yaradılıb, gənc kadrların hazırlanması istiqamətində önəmli addımlar atılıb.
M. Kərimov radioekologiya və radiasiya materialşünaslığı sahəsində apardığı tədqiqatlarla da tanınır. O, Atom Enerjisi üzrə Beynəlxalq Agentliklə əməkdaşlıq çərçivəsində bir sıra beynəlxalq layihələrə Azərbaycan alimlərinin qoşulmasını təmin edib. Alimin elmi fəaliyyətinin nəticələri ölkə daxilində və xaricdə dərc olunmuş 200-ə yaxın əsərdə əksini tapıb.
Yeni nəşrin elmi məsləhətçisi və ön sözün müəllifi AMEA-nın prezidenti akademik İsa Həbibbəylidir. Kitabın elmi redaktoru Mərkəzi Elmi Kitabxananın direktoru texnika elmləri doktoru Hüseyn Hüseynov, redaktorları Biblioqrafiya şöbəsinin müdiri, filologiya üzrə fəlsəfə doktoru Aytən Əliyeva və Elmi biblioqrafiya sektorunun müdiri Nərgiz Novruzova, tərtibçisi isə baş biblioqraf Rəna Cavadovadır.
Göstərici akademikin həyatı və elmi fəaliyyətinin əsas tarixlərini, kitab və məqalələrinin biblioqrafiyasını əks etdirir.
09:45 19.11.2025
Oxunuş sayı: 1128
