“Ruhlar şəhəri” artıq ruhumuzun şəhəridir
Prezident İlham Əliyevin 2023-cü il 31 iyul tarixli sərəncamı ilə hər il noyabrın 20-də Ağdam Şəhəri Günü təntənəli şəkildə qeyd edilir.
2020-ci il noyabr ayının 10-da əldə edilmiş üçtərəfli razılaşma ilə Ağdam, Kəlbəcər və Laçın heç bir güllə atmadan, şəhid vermədən erməni silahlılarından azad edildi. Bu Azərbaycanın döyüş meydanında qazandığı parlaq qələbəsinin diplomatik arenada da siyasi mübarizədə davamı idi. 27 il işğal altında olan Ağdam şəhəri qəsbkarlardan azad edildi, Azərbaycan Ordusunun bölmələri şəhərdə bayrağımızı ucaltdı.Bu tarixdən etibarən ərazilərimizdə həyat yenidən canlandı, quruculuq-abadlıq işlərinə başlanıldı. Azərbaycanın nadir incilərindən olan Ağdamı yer üzündən silən erməni barbarları şəhərdə misli görünməmiş vəhşilik həyata keçiriblər. Məhz buna görə də ki, Ağdamı “Qarabağın Xirosiması”, “Ruhlar şəhəri” adlandırırdılar. Britaniyalı jurnalist Tomas de Val 2000-ci illərdə yazdığı “Qara bağ” kitabında Ağdamı “Qafqazın Xirosiması”, 2010-cu ildə isə “Əl-Cəzirə” telekanalı Ağdamı “ruhlar şəhəri” adlandırdı.
Döyüşlərdə şəhər düşmənə 6 000-dən çox şəhid verib, onlardan 16-sı Azərbaycanın Milli Qəhrəmanıdır. İşğal nəticəsində 160 min nəfər əhalidən 143 min nəfəri öz ölkəsində məcburi köçkünə çevrilib.
Son illər ərzində Prezident İlham Əliyev və birinci xanım Mehriban Əliyeva dəfələrlə Ağdamda səfərdə olublar, burada həyata keçirilən təmir, bərpa və yenidənqurma işləri ilə tanış olub, rayonda keçirilən tədbir və bir çox yeni açılış mərasimlərində iştirak ediblər.
Ağdamda şəhər dirçəldilir, yenidən qurulur, bərpa işləri aparılır və yeni infrastruktur qurulur. Vətən müharibəsindən sonra ərazisində infrastrukturun bərpasına və yenidənqurma işlərinə başlanılıb. İndi yenidən qurulmaqda olan şəhər özünün əzəli sakinlərinin - ağdamlıların yolunu gözləyir. “Böyük Qayıdış” proqramı çərçivəsində Ağdam şəhəri və kəndləri yenidən tikilir, infrastruktur layihələri icra olunur, yollar inşa edilir, yeni istehsal müəssisələri yaradılır, yaşıllıqlar salınır, ərazilər mina və partlamamış hərbi sursatlardan təmizlənir. Tikinti-quruculuq işləri ara vermədən, yeni sosial obyektlərin, küçə və prospektlərin salınmasına, yeni bina və mənzillər tikilməsinə xüsusi diqqət göstərir. Yeni salınan obyektlər ölkəmizin ən böyük sənaye mərkəzlərindən birinə çevriləcək şəhərdə aparılan quruculuq işlərindən soraq verir.
Qeyd edək ki, yenidənqurma işlərindən sonra Ağdam Qarabağın ən böyük şəhəri olacaq. Keçmişlə gələcəyin, qədimliklə müasirliyin birləşəcəyi Ağdam həm də Azərbaycanın ən böyük yaşayış məskəninə çevrilir. Bugün böyük quruculuq meydanına çevrilən Qarabağ Azərbaycanın iqtisadi qüdrətinin göstəricisidir. Azərbaycan Prezidenti cənab İlham Əliyevin bölgədə reallaşdırdığı bütün layihələr heç bir beynəlxalq təşkilatdan və dövlətdən maddi yardım almadan yalnız öz iqtisadi imkanlarımız hesabına həyata keçirir.
5 il sonra öz yüz illiyini qeyd edəcək Ağdam, yalnız Azərbaycanın deyil, bütün Qafqazın mədəniyyət və tarix baxımından mühüm bir şəhəri olub və ilk şəhər tipli yaşayış məskənlərindən olaraq gün-gündən gözllşir və əzəli sakinlərinə qovuşur.
Afaq Sadıqova
Bakı Dövlət Universitetinin elmi işçisi
10:24 18.11.2025
Oxunuş sayı: 3158
