Səfirliyimizin vurulmasının cavabı nə olacaq? - Azərbaycanın Rusiyanı sıxışdırmaq üçün imkanlar var
Noyabrın 14-nə keçən gecə Rusiya silahlı qüvvələrinin Ukraynanın paytaxtı Kiyevə çoxkombinasiyalı hava hücumu nəticəsində Azərbaycanın Ukraynadakı səfirliyinin binasına ciddi ziyan dəyib.
Səfirliyin binası da daxil olmaqla divarlarına ciddi zərər dəyib. Divarın bir hissəsi uçub, həmçinin səfirliyin pəncərələri sınıb, diplomatlara məxsus avtomobillərə ziyan dəyib.
Hadisə yerinə Ukraynanın müvafiq qurumları da gələrək, dəyən ziyanı araşdırırlar.
Qeyd edək ki, bu, artıq birinci hal deyil. Paytaxt Kiyevə hava hücumları nəticəsində Azərbaycanın Ukraynadakı səfirliyinin binası bir neçə dəfə ziyan görüb. Lakin budəfəki ziyan miqyasına görə daha böyük və ciddi olub.
Səfirliyin şəxsi heyəti arasında yaralanan yoxdur. Bu hücumun mesaj xarakteri daşıyıb-daşımadığı, Azərbaycan–Rusiya münasibətlərinə necə təsir göstərə biləcəyi və gələcək diplomatik addımların nədən ibarət olacağı xüsusi maraq doğurur.
Professor, siyasi elmlər doktoru Sabir Məmmədli bu barədə Crossmedia.az-a danışıb: "Xatırladım ki, Rusiya bundan əvvəl Azərbaycanın xaricdəki maraqlarını təmsil edən, o cümlədən SOCAR-ın bazalarına da hücum etmişdi. Bu, onu göstərirdi ki, Rusiya məqsədli şəkildə Azərbaycana psixoloji təsir edir və gərginliyə çalışır. İndiki məqamda da həmin prosesin davamıdır. Rusiya həmişə dəqiq zərbələr endirir. Ona görə də səfirliyimizin vurulmasının təsadüfi olduğunu düşünmürəm. Ola bilsin, Rusiya Ukraynaya humanitar yardımlarına görə Azərbaycanı cəzalandırmağa çalışır".
O bildirib ki, rəsmi Bakının radikal addım atması yaxşı nəticə verməyə bilər: "Amma Azərbaycanın Rusiyanı sıxışdırmaq üçün kifayət qədər başqa vasitələri və imkanları var. Azərbaycan Rusiya üçün həmişə tranzit baxımından əhəmiyyətli olub. İkincisi, Azərbaycan “Noversis” kəmərindən istifadəni dayandıra bilər. Bu, Rusiyaya iqtisadi zərbə olacaq. Amma dediyim ki, birbaşa hansısa sərt qərar qəbul etmək doğru olmaz".
Röya Məmmədova
13:12 15.11.2025
Oxunuş sayı: 1479
