Prezident İlham Əliyev : Azərbaycan və Qazaxıstan arasında siyasi əlaqələr yüksək qarşılıqlı etimad ilə seçilir
Prezident İlham Əliyev Qazaxıstanın İnformasiya Agentliyi olan "Kazinform"-a müsahibə verib.
Crossmedia az -ın məlumatına görə, Prezident bildirib ki, bu gün Azərbaycan və Qazaxıstan arasında siyasi əlaqələr yüksək qarşılıqlı etimad ilə seçilir. Qarşılıqlı ticarət sahəsində də müsbət dinamika aydın görünür. 2024-cü ildə iki ölkə arasında ticarət dövriyyəsinin həcmi 470 milyon dollar, 2025-ci ilin yanvar-avqust aylarında isə əvvəlki ilin eyni dövrünü 3 dəfədən çox üstələyərək 547 milyon dollara çatıb. Hazırda Azərbaycanda Qazaxıstan kapitallı 250-yə yaxın kommersiya qurumu qeydiyyatdan keçib ki, bu da investisiya mühitinə etimadın yüksək səviyyəsini təsdiq edir və iqtisadi əməkdaşlığın daha da genişləndirilməsi üçün möhkəm zəmin yaradır. Azərbaycanın Qazaxıstan iqtisadiyyatına investisiyaları 225 milyon dollara çatıb. Qazaxıstanın Azərbaycana investisiyaları isə 136 milyon dollara çatıb.
Əhəmiyyətli infrastruktur layihələrindən biri Qazaxıstan və Azərbaycan arasında Xəzər dənizinin dibi boyunca sualtı fiber-optik kommunikasiya xətlərinin çəkilməsidir. Tikinti müqaviləsi 2025-ci ilin martında Bakıda imzalanıb, tamamlanması 2026-cı ilin sonuna planlaşdırılır ki, bu da rəqəmsal inteqrasiyanı gücləndirəcək.
Təəssüf ki, bu gün Xəzər dənizi bir sıra ciddi ekoloji problemlərlə üz-üzədir. Ən aktual problemlərdən biri həm ekoloji, həm də iqtisadi təhlükələr yaradan dayazlaşma - suyun səviyyəsinin sürətlə azalmasıdır.
İlham Əliyev bildirib ki, 1926-cı ildə Bakıda keçirilən I Türkoloji Qurultayın gələn il təntənəli şəkildə 100 illiyi qeyd olunacaq:
"Bu hadisə türk elminin, mədəniyyətinin, birliyinin inkişafında mühüm mərhələdir. TDT çərçivəsində Birinci Türkoloji Qurultayın yubileyinin təntənəli şəkildə qeyd olunması planlaşdırılır".
09:40 18.10.2025
Oxunuş sayı: 1234
