Bu səylər Azərbaycanın əsas hissəsi ilə Naxçıvan arasında maneəsiz əlaqəni nəzərdə tutur - Paşinyan
Ermənistanın baş naziri Nikol Paşinyan Düşənbədə MDB iştirakçı dövlətləri rəhbərlərinin Şurasının növbəti iclasında iştirak edib.
Dövlət başçılarını Tacikistan prezidenti Emoməli Rəhmon qarşılayıb, bundan sonra rəsmi foto və video çəkiliş mərasimi keçirilib.
Dar tərkibli iclasda baş nazir Paşinyan çıxış edib.
Paşinyan bildrib ki, uzunmüddətli münaqişədən sonra Ermənistan və Azərbaycan arasında sülh bərqərar olub və bu prosesdə əsas sənəd MDB-nin təməl sənədi olan 991-ci il Alma-Ata Bəyannaməsi olub.
“Bu il avqustun 8-də ABŞ prezidenti Donald Trampın təşəbbüsü ilə Vaşinqtonda keçirilən Sülh Sammitindən sonra prezident İlham Əliyevlə birlikdə bir bəyannamə qəbul etdik. Həmin bəyannamədə qeyd olunub ki, Ermənistan və Azərbaycan keçmiş münaqişə ilə müəyyənləşməyən, BMT Nizamnaməsinə və 1991-ci il Alma-Ata Bəyannaməsinə uyğun olaraq parlaq gələcəyə doğru yol açmağın vacibliyini qəbul edirlər.
Vaşinqton Bəyannaməsindən sitat gətirirəm: “Dərin insan iztirablarına səbəb olmuş münaqişədən sonra nəhayət ki, beynəlxalq sərhədlərin toxunulmazlığı və ərazi əldə olunması üçün güc tətbiq etmənin yolverilməzliyi əsasında dövlətlərimizin qonşuluq münasibətlərinin qurulmasına başlaması üçün şərtlər yaradılmışdır. Yenidən təftiş mövzusu olmayan və heç bir zaman olmayacaq bu reallıq dövlətlərimiz arasında düşmənçilik səhifəsinin bağlanmasına yol açır. Biz indi və gələcəkdə hər hansı bir qisas cəhdini qətiyyətlə rədd edir və istisna edirik”.
Eyni Bəyannamədə biz, Ermənistan və Azərbaycanın liderləri dövlətlərin suverenliyi, ərazi bütövlüyü və yurisdiksiyasına hörmət prinsipləri əsasında regionda və onun ətrafında sülh, sabitlik və rifahın təşviqi məqsədilə iki ölkə arasında nəqliyyat kommunikasiyalarının açılmasının vacibliyini bir daha təsdiqlədik”, - deyə Ermənistan Baş naziri vurğulayıb.
O bildirib ki, bu səylər Azərbaycan Respublikasının əsas hissəsi ilə Naxçıvan Muxtar Respublikası arasında Ermənistan ərazisi vasitəsilə maneəsiz əlaqəni və Ermənistan üçün qarşılıqlı üstünlüklü beynəlxalq və daxili nəqliyyat imkanlarını nəzərdə tutur.
“Həmçinin qeyd olunub ki, Ermənistan ABŞ və qarşılıqlı razılaşdırılmış üçüncü tərəflərlə birlikdə Ermənistan ərazisində “Beynəlxalq Sülh və Rifah Naminə Tramp Dəhlizi” (TRIPP) adlı kommunikasiya layihəsinin həyata keçirilmə çərçivəsini müəyyən etmək istiqamətində işləyəcək. TRIPP layihəsi Ermənistan üçün MDB üzv dövləti olan Azərbaycanla və MDB-nin digər üzvləri ilə dəmir yolu və digər nəqliyyat əlaqələri yaratmaq imkanı açır.
Bu, şübhəsiz ki, MDB çərçivəsində iqtisadi əlaqələrin möhkəmlənməsinə və təşkilatın səmərəliliyinin artmasına töhfə verəcək mühüm dəyişiklikdir. TRIPP layihəsi həmçinin MDB ölkələri üçün ixrac və idxal imkanlarını genişləndirir. Hörmətli həmkarlar, Vaşinqton Sammitindən əvvəl, bu ilin mart ayında Ermənistan və Azərbaycan “Sülh və dövlətlərarası münasibətlərin qurulması haqqında saziş” layihəsi üzrə razılığa gələ bildilər və danışıqları müsbət nəticə ilə başa çatdırdılar. Bu sənəd də 1991-ci il Alma-Ata Bəyannaməsinə istinad edir.
Bu kontekstdə tərəflər başa düşürlər ki, keçmiş SSRİ respublikaları arasında sərhədlər müstəqil dövlətlər arasında beynəlxalq sərhədlərə çevrilib. Buna görə də Ermənistan və Azərbaycan bir-birinin suverenliyini, ərazi bütövlüyünü, beynəlxalq sərhədlərin toxunulmazlığını və siyasi müstəqilliyini tanıyır və hörmət edirlər. Bu o deməkdir ki, hər iki ölkə qəbul edir: Ermənistan Respublikasının ərazisi keçmiş Ermənistan SSR-in ərazisinə, Azərbaycan Respublikasının ərazisi isə keçmiş Azərbaycan SSR-in ərazisinə bərabərdir və bu sərhədlər toxunulmazdır.
“Ermənistan Respublikası və Azərbaycan Respublikası arasında sülh və dövlətlərarası münasibətlərin qurulması haqqında saziş” Ağ Evdə ABŞ Prezidentinin, Azərbaycan Prezidentinin və mənim iştirakımla iki ölkənin xarici işlər nazirləri tərəfindən ilkin imzalanıb. Ümid edirəm və əminəm ki, yaxın gələcəkdə bu sazişi həm imzalayacağıq, həm də ratifikasiya edəcəyik.
Xüsusilə qeyd etmək lazımdır ki, 2024-cü ildə Ermənistan və Azərbaycan ilk ikitərəfli sənədlərini imzalayıb və ratifikasiya ediblər. Söhbət “İki ölkənin sərhədlərin müəyyənləşdirilməsi üzrə birgə komissiyalarının fəaliyyəti haqqında” reqlamentdən gedir. Bu sənəd hər iki ölkənin baş nazir müavinləri tərəfindən imzalanıb və həm Ermənistanda, həm də Azərbaycanda ratifikasiya olunaraq ali hüquqi qüvvə qazanıb”, - deyə Paşinyan qeyd edib.
O deyib k, bu reqlamentdə də MDB-nin əsas sənədi olan 1991-ci il Alma-Ata Bəyannaməsi iki ölkə arasında dövlət sərhədinin müəyyənləşdirilməsinin əsas prinsipi kimi təsbit olunub.
“Bu prinsip əsasında 2024-cü ildə dövlət sərhədinin təxminən 12 kilometrlik hissəsi delimitasiya olunub. Hörmətli həmkarlar, bütün bunları sizə məmnuniyyətlə çatdırıram, baxmayaraq ki, sülhün bərqərar olması Ermənistan-Azərbaycan gündəliyinin bütün məsələlərinin tükənməsi demək deyil. Biz hələ də qarşılıqlı ticarət, iqtisadi, siyasi və mədəni əlaqələr qurmalı, humanitar problemləri həll etməliyik. Uzun illər davam etmiş düşmənçilik tarixi nəzərə alındıqda, bu, asan olmayacaq. Lakin əldə olunmuş sülh bizə bu məsələlərin tədricən həll ediləcəyinə inam verir”, - deyə Ermənistan Baş naziri vurğulayıb.
Daha sonra Şuranın geniş tərkibli iclası keçirilib və iclas zamanı ölkə rəhbərləri razılaşdırılmış sənədlərin protokollarını imzalayıblar.
14:51 10.10.2025
Oxunuş sayı: 1352
