Parisdə şəhidlərimizin xatirəsi ehtiramla yad edilib
Parisdə Azərbaycan səfirliyinin Mədəniyyət Mərkəzində 27 Sentyabr - Anım Gününə həsr olunmuş tədbir keçirilib. Əvvəlcə Azərbaycan Dövlət Himnini səsləndirilib, şəhidlərimimizin əziz xatirəsini bir dəqiqəlik sükutla yad edilib.
Azərbaycanın Fransadakı səfiri Leyla Abdullayeva, UNESCO yanında daimi nümayəndə Elman Abdullayev və səfirliyimizin hərbi attaşesi Cavid Abdullayev çıxış edərək bu günün tarixi əhəmiyyətindən danışıblar.
Natiqlər Prezident İlham Əliyevin Sərəncamı ilə 27 sentyabrın Anım Günü kimi qeyd edilməsinin Vətən müharibəsində qəhrəmancasına döyüşmüş, ölkəmizin ərazi bütövlüyü yolunda canlarını fəda etmiş əsgər və zabitlərimizə, bütün şəhidlərimizə dərin ehtiramın ifadəsi olduğunu bildiriblər. Qeyd olunub ki, Müzəffər Ali Baş Komandan İlham Əliyevin rəhbərliyi ilə rəşadətli Ordumuz “Dəmir yumruq” əməliyyatı nəticəsində Azərbaycan hərb tarixində qəhrəmanlıq salnaməsi yazıb. Bu azadlığı və fəxarəti azərbaycanlılara bəxş edən şəhidlərimizin xatirəsi qəlbimizdə əbədi yaşayacaq.
Diplomatlar dövlətimizin başçısının yüksək siyasi məharəti sayəsində diplomatik cəbhədə də böyük uğurlar qazanıldığını vurğulayıblar. Bildiriblər ki, 44 günlük Vətən müharibəsində Zəfərimizi təmin edən əsas amil xalq-dövlət-ordu vəhdəti İkinci Qarabağ savaşı zamanı mühüm rol oynayıb. Bu birliyin qorunub saxlanılmasının və daha da möhkəmlənməsinin hər bir azərbaycanlı üçün vətəndaşlıq borcu olduğu xüsusi qeyd edilib.
Natiqlər vurğulayıblar ki, xalqımızın otuz illik arzusunu reallığa çevirərək, hərbi qüdrətini bütün dünyaya göstərən Ordumuzun qəhrəman əsgər və zabitləri bu gün də işğaldan azad edilmiş ərazilərimizin, sərhədlərimizin mühafizəsi və müdafiəsində “Dəmir yumruq” kimi dayanmaqda davam edirlər.
Çıxışlarda şəhidlərimizin və qazilərimizin döyüş yolundan söz açılıb, onların hər birinin qəhrəman olduğu vurğulanıb və bu qəhrəmanlarla xalqımızın fəxr etdiyi xüsusi qeyd olunub.
Tədbir iştirakçıları şəhidlərimizə Allahdan rəhmət diləyiblər.
20:29 26.09.2025
Oxunuş sayı: 1108
